Странска државјанка се обидела со изнајмен автомобил во кој патувала како сопатник да шверцува златен накит вреден 600 илјади денари. Цариниците ја спречиле кога при контрола на автомобилот во чантата во нејзина сопственост пронашле разновиден златен накит со тежина од 200 грама
Македонските цариници, на граничниот премин „Богородица“, спречиле обид за шверц на сребрен накит во вредност од 430 880 денари. Сребрениот накит е запленет, а до едно лице е поднесена кривична пријава до ОЈО Гевгелија за сторено кривично дело криумчарење, информираат од Царинската управа.
„Лицето во вечерните часови пред полноќ, на влез на граничниот премин се пријавил со туѓ автомобил за што имал одобрение за управување. Поради сомневање селектиран е за детална контрола, при што во фабричките празнини зад предните бришачи, како и во фабричката празнина зад фиоката пред совозачкото седиште пронајдени се 387 парчиња нараквици, 134 пара обетки и 759 ланчиња. Случајот е предаден во Одделението за истраги при Секторот за контрола и истраги од каде е поднесена кривична пријава“,
се наведува во соопштението на Царинската управа.
Оттаму додаваат дека цариниците на граничниот премин Дојран спречиле обид за нелегален внес на девизи, при што запленети се 9 250 евра. Имено, при контрола на автомобил со странски регистарски таблички управуван од грчки државјанин, царинските службеници пронашле 19 250 евра, при што согласно Законот за девизно работење му се вратени 10 илјади евра, а останатите се запленети.
На граничен премин Табановце во изминатиот период биле спречени обиди за криумчарење злато, лаптопи како и друга вредна стока, додаваат од Царинската управа.
Странска државјанка се обидела со изнајмен автомобил во кој патувала како сопатник да шверцува златен накит вреден 600 илјади денари. Цариниците ја спречиле кога при контрола на автомобилот во чантата во нејзина сопственост пронашле разновиден златен накит со тежина од 200 грама. Станува збор за една круна, ланче со три монети, ланче со седум монети, две ланчиња со пет монети, ланче со единаесет монети и две нараквици. Против неа е поднесена кривична пријава.
„Царинската служба за мобилен скенер на влез во државата на граничен премин Табановце, заплени 284 парчиња облека, откако истите ги пронајде при контрола на камион со бугарски регистарски таблички. Случајот е откриен откако при скенирање на камионот со мобилен скенер е утврдено дека во камионот има неправилности, по што е направена физичка контрола и се пронајдени непријавените парчиња облека. Во друг случај на царинска испостава Табановце мобилен царински тим заплени и 1 500 пара чорапи со потписот на „Најк“ откако истите ги пронајде при контрола на камион пријавен за транзит. При контрола на камионот е утврдено дека покрај останатата стока која била уредно декларирана има и стока која воопшто не била опфатена со царинските документи“,
се додава во соопштението.
Струмичанец се обидел да криумчари во државата шест употребувани велосипеди, 13 употребувани лаптопи, два компјутери за мотор и 30 крстачи за кардан.
Во обидот бил спречен од мобилен царински тим кој при контрола на комбето со кое управувал, ја открил непријавената стока. Имено, на прашање на царински инспектор дали има нешто да пријави, лицето одговорило дека има скара, скала, агрегат, прскалка, при што поради сомневање е селектиран за контрола и во четири вреќи и патни торби се пронајдени непријавените производи.
Скопјанец се обидел преку граничниот премин „Табановце“ во државата да шверцува 180 парчиња различни шминки, над 40 парчиња женски шорцеви, како и разна друга стока. Во намерата го откриле царинските службеници кои поради сомневање го селектирале за детална контрола при што во патничкото комбе со кое управувал биле пронајдени непријавените производи за кои требал да плати давачки.