Од полицијата велат дека сè уште не може да дадат никакви информации за причината за пожарот затоа што истражителите не биле во можност да влезат во објектот поради тоа што било премногу опасно

Три лица се загинати, а најмалку 16 се повредени во пожар кој настанал во киоск, а потоа зафатил и станбена зграда во Дизелдорф. Две од лицата кои се повредени се во животна опасност.
Пожарот настанал ноќеска во 02:25 часот. Од противпожарната служба на Дизелдорф велат дека откако се запалил киоскот пламенот брзо се раширил на првиот кат од зградата. Жителите барале помош од балконите од каде дел од нив биле и симнати, пренесува германскиот весник „Билд“.
На местото на настанот имало околу стотина пожарникари.
„Откако куќата беше евакуирана дојде ужасната вест. За три лица помошта дојде предоцна. И покрај брзата интервенција на противпожарната бригада, итните служби најдоа мртви лица“,
изјави портпаролот на противпожарната бригада Стефан Боле.
Според полицијата, идентитетот на загинатите сè уште не е познат.
Службеници од Одделот за криминалистички истраги се на местото на пожарот каде трае истрагата.
„Сè уште не можеме да дадеме никакви информации за причината за пожарот затоа што истражителите сè уште не биле во можност да влезат во објектот – премногу е опасно“,
изјавиле од полицијата за „Билд“.