Тренчевска вели дека во СДСМ треба да настапат „оние со квалитети, вистински знаења, лицата блиски до народот на кои им се верува“
Претседателката на Форумот на жени на Социјалдемократскиот сојуз на Македонија (СДСМ), Јованка Тренчевска објави дека се повлекува од партиската функција. Причината, како што вели, е тоа што вчерашниот изборен ден покажал дека во демократска држава моќта е на народот.
Во објава на својот фејсбук-профил Тренчевска вели дека од партиските структури се повлекува целосно одговорно и самосвесно, со сигурност дека не ја изневерила довербата која ѝ беше дадена.
Тренчевска вели дека во СДСМ треба да настапат „оние со квалитети, вистински знаења, лицата блиски до народот на кои им се верува“.
„Нови лица, неизвалкани од бремето на претходните функционери. Јас верувам во моите социјалдемократи и знам дека промените ќе бидат на подобро“,
пишува Тренчевска.
Во објавата таа се осврнува на дел од мерките и законите кои биле носени додека таа била на министерските функции и додава дека сфатила оти на граѓаните не им се потребни само добри закони, туку и силни реформи.
„Во нашиот мандат како Социјалдемократски сојуз на Македонија, никој не оставивме сам, носевме мерки и закони кои помагаат на сите граѓани. Ги донесовме највисоките плати и пензии, се грижевме за најмладите и за лицата со попреченост. Чекори кои не сакам да избледат низ времето“,
вели таа.
Тренчевска додава дека ќе продолжи напред и нема да дозволи уназадувањe на социјалната работа и укинување мерки кои се од полза на граѓаните.
„Продолжувам цврсто напред. Нема да дозволам уназадувањe на социјалната работа и укинување на мерки кои се од полза на граѓаните. Мене ме водат вредности во кои секој заслужува поддршка, можности и напредок, и така ќе делувам од позиција на пратеник“,
додава Тренчевска.
Од партиската функција потпретседател на СДСМ, по вчерашните избори, на кои партијата загуби, оставки си поднесоа и Фатмир Битиќи и Перо Костадинов.
Во своите објави на Фејсбук, тие велат дека резултатите од изборите се поттик за промени и за реформирање на партијата.
На вчерашните двојни избори, по обработени 99,27 отсто од избирачите, најмногу мандати – 58 има освоено коалицијата „Твоја Македонија“ предводена од ВМРО-ДПМНЕ. „Коалицијата за европска иднина“ предводена од СДСМ има освоено 18 мандати, еден помалку од „Европскиот фронт“ на ДУИ, кој има 19 мандати.