Платите во јавниот сектор, како што се тие на директорите, се предмет на регулација на новиот закон за плати во јавниот сектор, кој засега е во работна верзија и се собираат коментари и забелешки. Во иста фаза е и предлог-законот за работни односи, кој овозможува родителско отсуство при раѓање на дете до 13 месеци, го ограничува вработувањето на определено на две години итн., а се прави и дистинкција помеѓу полесни и потешки прекршувања на законот – за првите ќе има опомени, за вторите директни глоби
Предлог-законот за систем на плати во јавниот сектор со кој би се воспоставила граница на највисока плата не е противуставен, смета министерката за труд и социјална политика Јованка Тренчевска.
Целта, вели таа, е воспоставување ред во платите во јавниот сектор бидејќи не може директор на некое јавно претпријатие да зема поголема плата од претседателот на државата.
„Сега имаме различни плати за иста работа во различни институции. Целта на овој закон е во секоја дејност, во секоја област да воспоставиме граница на највисока плата и да не може од таа плата да се оди погоре, а согласно највисоката плата надолу за останатите работни места согласно сложеноста на работа да им се пресмета платата. Да ставиме еднаш засекогаш ред во јавниот сектор, не може директор на јавно претпријатие да зема поголема плата од претседателот на држава или, пак, директор на јавно претпријатие да зема поголема плата од министерот кој му е надлежен во таа област“,
кажа Тренчевска денеска на брифинг со новинарите.
Предлог-законот за систем на платите во јавниот сектор засега е во работна верзија, ставен е на електронскиот систем ЕНЕР за да може да секој да испрати коментира и забелешки.
Во иста фаза е и предлог-законот за работни односи кој изминатиот период беше актуелен во јавноста, најмногу поради одредбите за вработување на определено време и зголемувањето на породилното отсуството.
Тренчевска уште еднаш појасни дека според оваа верзија, работодавецот ќе може да држи работник со договор на определено најмногу две години, а во нив ќе може само три пати да го продолжува договорот што ќе значи дека нема да смее да го држи работникот во неизвесност секој месец да потпишува анекс.
„Доколку после две години работодавецот има потреба од работникот, тој е должен да му го трансферира работниот однос од определено на неопределено време. Со заштитниот механизам да не може повеќе од трипати да се потпише анекс на договор, правиме унапредување и поголема заштита на работниците затоа што анализите покажуваат дека досега договорите на определено време, особено можноста секој месец да се потпишува нов анекс со работниците, беа предмет на злоупотреба и непочитување на тоа што е интенцијата на законодавецот во постоечкиот Закон за работни односи“,
вели Тренчевска.
Вработување на определено најмногу две години
Во однос на казнивоста, министерката посочи дека анализите на Државниот трудов инспекторат покажале дека не може опомена да се дава за дело што е тешка повреда на правата од работен однос. Поради тоа, направена е дистинкција на полесни и потешки прекршувања на законот. Опомената, како што посочи, е за мал дел на прекршувања како што е на пример случајот ако договорот за вработување не стои во седиштето на работодавецот, а во случај на пример ако не се исплаќаат додатоци тогаш ќе се изрекува директно прекршочна глоба.
Нема кратење на породилното: Ќе има родителско отсуство од 13 месеци
Во делот за породилното отсуство од Законот за работни односи, Тренчевска уште еднаш повтори дека нема кратење на породилното отсуство.
За породилното, пак, како што е познато според актуелната верзија тоа се зголемува за четири месеци бидејќи покрај постојните девет месеци за мајката (според предлогот поделени на 5 месеци мајчинско и 4 месеци родителско отсуство), се овозможуваат поголеми привилегии и за таткото – 15 дена татковско отсуство кога ќе се роди бебето и дополните четири месеци родителско кое тој ќе може да ги користи паралелно или кога ќе завршат деветте месеци на мајката.
„Значи, периодот којшто и во моментов го има жената која ќе роди едно дете – девет месеци од постојниот Закон продолжува и во новиот закон. Кај татковството воведуваме ново право. Татковство во период од 15 дена за раѓање на едно дете или 20 дена ако се родат две и повеќе деца, право на платено отсуство на таткото. Покрај мајчинството и татковството имаме и родителско отсуство, односно четири месеци за родителско отсуство и ако ги собереме сите отсуства вкупно имаме 13 и пол месеци коишто ги даваме на двајцата родители за да може да бидат со своето дете до двегодишна возраст“,
рече денеска Тренчевска.
Во своите претходни јавни настапи, министерката посочи дека во моментов се преговара со Фондот за здравствено осигурување и со Министерството за здравство околу прашањето колку да биде платено отсуството од четири месеци за таткото. За мајката и 15-те дена за таткото, според предлог-верзијата на законот, ќе се плаќа 100 отсто.
Опомена ќе има за помали прекршувања на законот, но директна глоба за потешките
Во однос на казнивоста за непочитување на Законот за работни односи, пак, министерката посочи дека анализите на Државниот трудов инспекторат покажале дека не може опомена да се дава за дело што е тешка повреда на правата од работен однос. Поради тоа, направена е дистинкција на полесни и потешки прекршувања на законот. Опомената, како што посочи, е за мал дел на прекршувања како што е на пример случајот ако договорот за вработување не стои во седиштето на работодавецот, а во случај на пример ако не се исплаќаат додатоци тогаш ќе се изрекува директно прекршочна глоба.
Инаку, како што кажа министерката, најголем дел од забелешките за предлог-законот за работни односи се во делот на колективните договори, но и на договорите за определено време иако за важноста на договорите за определено време, нагласи, има согласност.
Очекувањата на Тренчевска се дека новиот Закон за работни односи ќе се усвои на крајот на првата или почетокот на втората половина од годинава.