Министерката за труд и социјална политика Јованка Тренчевска во неделното интервју на Радио Слободна Европа кажа дека помошта за граѓаните би можела да биде поголема, но и дека со мерките се опфатени голем број на лица. Вели дека Владата донела навремени мерки за ранливите категории граѓани, но инфлацијата ги „изела” парите кои граѓаните треба да ги добијат како помош.
На прашањето дали овие пари ќе бидат доволни за граѓаните, таа вели дека секогаш може и повеќе но и дека треба да се земе во предвид дека со овие мерки се опфатени околу 180 илјади граѓани на Северна Македонија.
„Покрај сетот на мерки што ги презедовме претходно преку измена на законската регулатива, како што е зголемување на минимална плата, усогласувањето на пензиите, тоа се политики кои значат постојан раст на платите и на пензиите и политики кои ја следат инфлацијата”,
вели Тренчевска за РСЕ.
Тренчевска вели дека во зависност од состојбата по четири месеци од сега, Владата ќе ги разгледа сите анализи и ако има потреба повторно ќе се донесе сет мерки за ранливите категории на граѓани.
„Примателите на гарантирана минимална помош ќе добијат по 3000 денари, надвор од правото на гарантирана минимална помош, што требаше како еднократна помош да го добијат уште пред ребалансот, но поради чекањето да помине ребалансот на Буџетот, па законските измени, ова право ќе им биде дадено сега. Да не заборавам дека и на самохраните родители, кои се приматели на гарантирана помош ќе им се овозможи финансиска поддршка од по 3000 денари во наредните четири месеци”,
вели Тренчевска.
Таа заклучува дека намерите на Министерството за труд и социјална политика во наредниот период е што повеќе граѓани што се во системот на социјална заштита, односно приматели на гарантирана минимална помош да ги вклучиме, односно да ги активираме на пазарот на трудот. Нивниот приоритет е активацијата во следниот период, за да можеме не да бидат зависни од социјална заштита со години, туку со својот труд да бидат активирани на пазарот на труд.