„Јас сум за цврста и силна граѓанска контрола на Армијата. Ќе имам разговори и консултации со одговорните. Ќе ги прашам сите, така што слободно може да се размислува на оваа тема“, рече претседателката
Има млади луѓе кои на доброволна основа би сакале да служат воен рок. Можеби би требало да се размислува да се овозможи тоа, да се иницира дискусија, па да се слушне и мислењето на експертите по ова прашање. Ова денеска од Охрид го изјави претседателката Гордана Сиљановска-Давкова, која во придружба на началникот на Генералштабот на Армијата, генерал-потполковник Васко Ѓурчиновски, присуствуваше на показна вежба на припадниците на Армијата од Баталјонот на специјални сили кои изведуваат обука во кампот за обука на вода на Охридското Езеро.
„Дел од младите имаат желба како некогаш да бидат дел не само од професионалната армија, туку доброволно да се вклучат во вооружените сили. Можеби би требало да поразговараме. Независно која би била одлуката по дискусијата, ова што го видовме овде ни дава чувство на безбедност“,
рече таа.
Според неа, на тој начин и односот кон Армијата би бил попозитивен, но посочи и дека треба да се слушнат аргументите, како и да се тестира расположенито кај граѓаните.
„Јас сум за цврста и силна граѓанска контрола на Армијата. Ќе имам разговори и консултации со одговорните. Ќе ги прашам сите, така што слободно може да се размислува на оваа тема“,
вели Сиљановска-Давкова.
Во времето на поранешната заедница, според неа, отслужувањето на воен рок значело интеракција на најразлични профили на луѓе, градење односи на солидарност и разбирање.
„Тоа го видовме тука денеска, колку е потребна таа соработка. Се разбира дека можеби тоа навистина е важно во ова време. Потребата од посветеноста и дисциплината да бидат императив во секоја област од професионалниот ангажман“,
рече претседателката.
Уште еден доказ зошто Армијата има заслужено високи оцени и ужива најголема доверба кај граѓаните, според Сиљановска-Давкова, ја потврдува професионалноста, посветеноста и исполнителноста на нашата армија, која достојно и дисциплинирано ги исполнува задачите согласно НАТО-стандардите.
„Сум знаела дека нашето учество во многубројни мисии е заслужено, знам колку награди добиле овие луѓе, но сега на лице место видов што се можат да направат. Уште еднаш, зборови на немерлива почит, горда сум што сум командантка на овие луѓе, на нашите вооружени сили, посакувам да нема потреба да бидат употребени, но знам дека оваа земја треба да се чувствува безбедно“,
вели таа.
Во сите области, како во владеењето на правото, во развојот на демократијата, во независното судство, во образованието, како што рече, посакува да се достигнат стандардите што ги поседуваат специјалните единици на Армијата.
„Елитизмот не значи да сте на некоја висока функција, туку да сте прв во својата струка, во професијата, а тоа треба да важи и за политиката“,
рече Сиљановска-Давкова.
За Армијата, како столб на националната и колективната безбедност, според претседателката, е неопходно да продолжиме да вложуваме во натамошна модернизација и во едукација на армиските припадници.