Американскиот претседател претходно денеска нареди федералните и државните знамиња во САД да бидат спуштени на половина копје на денот на погребот на папата Франциск во знак на почит кон споменот на поглаварот на Римокатоличката црква
Американскиот претседател Доналд Трамп денеска изјави дека сè уште не е сигурен дали ќе присуствува на погребот на папата Франциск, кого го нарече многу добар човек.
„Сè уште не знам. Ќе бидете веднаш информирани за тоа“,
им рече Трамп на новинарите во Белата куќа.
На прашањето дали би сакал да оди на погребот на папата, Трамп рече дека мора да го разгледа својот распоред.
Американскиот претседател претходно денеска нареди федералните и државните знамиња во САД да бидат спуштени на половина копје на денот на погребот на папата Франциск во знак на почит кон споменот на поглаварот на Римокатоличката црква кој почина денеска на 88-годишна возраст.
Знамињата ќе се веат на половина копје во кругот на Белата куќа и сите јавни згради и објекти, сите воени пунктови и поморски станици, а одлуката важи и за знамињата во сите амбасади, конзуларни канцеларии и други објекти на САД во странство.
Претходно денеска, во куса објава на својата социјална мрежа Трут соушл, Трамп се прости од папата Франциск.
„Почивај во мир, папа Франциск! Нека Бог го благослови него и сите што го сакаа!“,
напиша Трамп во објавата.