Лидерот на Демократски сојуз, Павле Трајанов, смета дека чекорот на пратениците од Либерално-демократската партија за настапување како засебна пратеничка група е исправен и во иднина овој потег треба да го следат и другите партии.
Трајанов во изјава за МКД.мк вели дека тој и досега, и како пратеник во Собранието и преку јавните настапи, изразувал лични политички ставови и ставои на својата партија, кои не секогаш се исти со тие на коалициониот партнер СДСМ. Смета дека самостојното делување во парламентот на партиите ќе биде неминовен процес и во другата голема коалиција, таа на ВМРО-ДПМНЕ.
„Самостојното делување во парламентот овозможува повеќе процедурални погодности. Во моментов пратениците се ограничени во поглед на барањето за процедурално обраќање, за барање на пауза на седниците, или пак се ограничени и во поглед на давање на реплика на говор на пратеник од коалицијата“,
вели Трајанов.
Според него, самостојното делување на пратениците не значи ситнење на парламентарното мнозинство, ниту значи паѓање на Влада во одреден момент, затоа што тоа може да се случи и во услови кога коалицијата е цела.