Обвинителката Лиле Стефанова преку сведоците Сеад Кочан, поранешен управител на „Трансмет“ и Златко Кочишки, од фирма за изнајмување опрема за настани, на денешното рочиште за предметот „Титаник“ докажува незаконитости во покривањето на трошоците за кампањата на ВМРО-ДПМНЕ на изборите во 2011 година.
Од затвор во судот утрово беше спроведен бизнисменот Сеад Кочан, кој беше управител на фирмата „Трансмет“. Одговарајќи на прашањата на Стефанова, Кочан рече дека фирмата „Трансмет“ не се јавува како донатор на ВМРО-ДПМНЕ во 2011, а рече и дека не се сеќава дека ниту тој, лично, како физичко лице бил донатор.
Меѓутоа, сведокот Златко Кочишки од фирмата „ДВД Пет“ која изнајмувала опрема за помали митинзи на партијата, како што се осветлување и бина, посочи дека тие не издавале фактури кон ВМРО-ДПМНЕ, туку кон „Трансмет“.
„Според анализите кои ги направивме во фирмата немам дадено фактура во ВМРО-ДПМНЕ”, рече Кочишки.
Потоа обвинителката праша и дали за оваа услуга имаат фактурирано на друга фирма.
„Фактурирав таму каде што Логин (Кочишки – н.з.) ми даде инструкции. Јас не сум ги фактурирал, туку претпоставувам дека, откако сум ги добил инструкциите, само сум се јавил на телефон во фирмата да им кажам за која фирма да направат фактура“, рече сведокот, кој потоа на прашањето дали се сеќава на која фирма се фактурирало додаде: „Во консултации со вашите луѓе истражители кога дојдоа во фирма за проверка дали сме фактурирале на фирмата ‘Трансмет’ излезе дека сме фактурирале”.
Адвокатите од одбраната, пак, прашаа и како фактурирале за изнајмената опрема на СДСМ директно или преку трети фирми, сведокот рече дека не се сеќава.
За денеска во судот беше повикан да сведочи и Логин Кочишки, но тој не се појави на рочиштето.
Во судница денеска сведочеа и управители на фимирите „Сиива“ и „МИК Свети Николе“. Тие одговараа на директни прашања од Стефановска, за тоа дали фирмите давале услуги за кампањата на политичката партија ВМРО-ДПМНЕ во 2011 година и како ги наплаќале – дали директно или преку трети фирми. Откако сведоците не можеа да се сетат на кого и како фактурирале, обвинителката им посочи и конкретни фирми за кои биле фактурирани услуги, меѓу кои и фирмата „Полиестердеј“.
Оваа фирма е една од двете во кои пред извесно време влегоа полициски инспектори за да проверат за долг кој го има ВМРО-ДПМНЕ, но од последните претседателски избори во април и мај годинава. Покрај во оваа, се проверува и една фирма од Шпанија.
Следното рочиште за „Титаник“ е закажано за 20 септември.
Според дел од обвинението за овој предмет, Никола Груевски и Мартин Протоѓер во текот на изборната кампања, преку Миле Јанакиески и Кирил Божиноски изнајмиле оперма и набавиле рекламен материјал за изборната кампања кој бил платен од фирмите „Трасмет“, „Секјуриком“ и уште една фирма.
„Овие средства во износ од 3.128.777 денари биле должни да ги пријават како донација, но не ги внеле во регистарот на донации. Сведоци ќе потврдат дека управителите на фирмите кои ги дале услугите, фактурите наместо кон политичката партија ВМРО-ДПМНЕ биле упатени да ги насочат кон правните лица, како услугите да биле извршени за овие правни лица”, рече обвинителката Стефанова во воведните зборови за овој предмет.
Во „Титаник“, обвинети се поранешниот премиер Никола Груевски кој избега и доби азил во Унгарија, ексгенералниот секретар на Владата Кирил Божиновски, поранешната министерка за внатрешни работи Гордана Јанкулоска, ексминистерот Миле Јанакиески, Мартин Протоѓер, како и Билјана Бришкоска Бошковски, Илија Димовски, Мунир Пепиќ, Едмонд Темелко, Леко Ристоски, Кирил Тодоровски, Катерина Веловска, Станко Коруновски, Коста Марковски, Драгче Драгчески, Марјан Накевски, Гоце Јаневски, Џезми Ахмет, Роберт Давитков, Далибор Алешковиќ и Ленка Рашјаковска.
Тие се осомничени за злосторничко здружување, повреда на избирачкото право, повреда на слободата на определување на избирачите, поткуп при избори и гласање, уништување изборен материјал и злоупотреба на средства за финансирање изборна кампања.