Немаме дупка од 400.000 евра во финансискиот извештај за претседателските избори туку имаме обврска кон фирма која ќе ја исполниме, вели лидерот на ВМРО-ДПМНЕ, Христијан Мицкоски, за долгот на партијата кон фирма за печатење маици за што од владејачката СДСМ изминатиот период обвинуваа дека е прекршен Изборниот законик.
„Имаме облигација со правно лице кое испорачало услуга за ВМРО-ДПМНЕ под определи услови во кои партијата треба да ја сервисира таа услуга и воопшто ние не излегуваме надвор од таа облигација која ја имаме потпишано со таа фирма. Но, тоа правно лице не е донација од господинот Камчев туку е правно лице кое со таа дејност се занимава години наназад и во тој момент дало најисплатлива економска понуда“, вели Мицкоски.
Тој на прес-конференцијата попладнево објаснуваше дека со тоа што сметката е затворена со негативно салдо не е прекршен Изборниот законик. Во членот 71 од овој закон, посочи Мицкоски, јасно е дефинирано што значи изборна сметка, како се собираат средства и за што служат.
„Никаде не стои дали тие средства ако не се доволни тоа подразбира дека имаме каква било поинаква одговорност. Ставот 11 од овој член е прецизен и вели дека три месеци по изборите политичката партија е обврзана да ја затвори таа сметка така што понатаму обврските се преземаат од страна на правното лице, во случајот политичката партија“, рече лидерот на опозицијата.
Тој посочи и дека Изборниот законик предвидува дека тие мора да достават финансиски извештаи, како и дека Државниот завод за ревизија врши ревизија на извештаите и ако констатира прекршок тоа го доставува до обвинителството.
„Во моментов во партијата имаме претставници од ревизија која проверува, ги повикувам тоа што побргу да го завршат тоа и да ја демантираме таа лажна вест“, рече Мицкоски.
Тој посочи дека вакви примери со затворање на изборна сметка со негативно салдо имало и на минатите избори и ги наведе парламентарните избори 2016 кога ДУИ ја затворила сметка со долг од над 2 милиони денари, како и коалицијата „ВМРО за Македонија“, на Стојанче Ангелов, Љубе Бошкоски и Љупчо Георгиевски, која имала негативно салдо од 3 милиони денари.
„И сметката на Пендаровски за последните претседателски избори е во негатива“, рече Мицкоски.
Од владејачката партија СДСМ, пак, во изминатиот период повикувајќи се извештаите, посочуваа дека е прекршен законот токму затоа што сметката за кампањата на Гордана Силјановска-Давкова е затворена со долг.
Долгот на ВМРО-ДПМНЕ е за печатење маици. Порталот Нова ТВ на 15 ноември објави дека партијата од фирмата „Полиестердеј нарачала за печатење 270.000 маици. Но, бидејќи оваа фирма немала доволно, 100.000 парчиња купила од МОНТ на „Орка холдинг“, на Орце Камчев.
Пред четири дена полициски инспектори влегоа во овие две фирми да ја проверат документацијата откако МВР испратило допис до скопското обвинителство за сомнителни околности во врска со финансиските извештаи на една политичка партија и дека треба да се направат дополнителни проверки за евентуални нерегуларности. Покрај двете домашни, македонската полиција, според информациите, преку меѓународната соработка проверува и една фирма во Шпанија.
Влегувањето во фирмата „МОНТ“ на Камчеви тогаш го потврдија и тие.
Повеќе детали за овој случај кој е во предистражна фаза прочитајте ТУКА.