Во рамки на активностите поврзани со последиците од пожарот во Кочани досега се ангажирани 32 психолози
Тимот за интервенции во кризи на Комората на психолози денеска ќе одржи состанок со пожарникарите кои учествуваа во гаснењето на пожарот и спасувањето на децата во дискотеката во Кочани.
Во рамки на активностите поврзани со последиците од пожарот во Кочани досега се ангажирани 32 психолози.
Од раните утрински часови на 16 март – денот кога изби пожарот во кочанската дискотека – 12 психолози од Тимот за кризни интервенции на Комората на психолози во соработка со Центарот за ментално здравје се присутни на пунктовите пред болницата „8 Септември“, Ургентниот центар и болницата „Свети Наум Охридски“ каде што даваат прва психолошка помош на семејствата чии деца се донесени на лекување.
Вчера, на денот на погребите на загинатите, 15 психолози биле ангажирани да присуствуваат на сите закопи во Кочани, околните села, Штип, Струмица, Скопје.
Секојдневно се работи и со родителите кои ги изгубиле своите деца во пожарот.