Францускиот амбасадор ги повика големите политички партии да го донесат законот за Јавното обвинителство, кој ќе биде добар и ќе задоволува одредени критериуми и тоа да го направат без предрасуди за партијата или поради лични интереси
Франција е задоволна од начинот на којшто се спроведуваат активностите околу новата методологија за преговори што Европската комисија треба да ја објави утре и нејзината усогласеност со барањата од францускиот нон-пејпер. Ова во интервју за Телма го изјави амбасадорот на Франција во земјава, Кристијан Тимоние, кој вели дека тој процес овозможува да се одговори на некои прашања кои предизвикувале загриженост во Франција.
За Тимоние тоа значи дека Унијата сака да ја надмине пречката во поглед на методологија за земјите од Западниот Балкан, а која, вели тој, ќе биде побрза, пореална, посоодветна на потребите на граѓаните.
„Она што ние го посакувавме е да се зачува тој важен аспект од владеењето на правото којшто ќе има и понатаму централно место во сите наши барања за постигнат напредок, но и со соодветна динамика којашто ќе овозможи прогресивно членство… Прашањето има значаен политички аспект, имајќи го предвид фактот што се воспоставува принципот на реверзибилност. Ќе бидат наградувани и тоа на видлив начин сите напредувања, но во случај на тешкотии и назадувања, ќе биде потребно враќање назад. Она што ние сакаме да го избегнеме, а коешто постоеше во минатото и претставуваше проблем е што, откако преговорите ќе започнеа, понекогаш воопшто не им се гледаше крајот“,
вели Тимоние.
Тимоние во интервјуто ја повторува изјавата дадена минатата недела дека е можно процесот на реформи во ЕУ и пристапните преговори да се водат паралелно, што претставува своевиден преврт во француската позиција
„Откако ќе се отворат преговорите според методологијата, за што ќе биде потребно време, поради реформите кои треба да се спроведат за тоа да се постигне, а потоа и да се преговара пакет по пакет, а не по поглавја, бидејќи поглавјата најчесто долго време стојат отворени. Секако, посакуваме тоа да се случува истовремено. Тоа го велиме затоа што станува збор за загриженост што не ја искажува само Франција, туку и другите земји, од причина што системот на одлучување, внатре во Унијата, треба да се преиспита. Вие од ваша страна ќе работите, но и ние ќе работиме од наша страна, зашто не би било соодветно да ве пречекаме во простор каде што правилата не се функционални“,
вели Тимоние.
На прашањето да ја објасни неговата минатонеделна изјава дека даумот е многу блиску, францускиот амбасадор истакнува дека тоа е одлука одлука која државите-членки треба да ја донесат заедно, но според него надежта е тесно поврзана со усвојувањето на методологијата.
„Во моментот кога методологијата ќе биде усвоена, ќе знаеме дека сме направиле голем исчекор напред“,
објаснува Тимоние.
За тоа дали Франција во март ќе ја разочара или ќе ја израдува Македонија, Тимоние одговара:
„Не мислам дека наша цел е да разочаруваме. Нашата цел е да ве прифатиме во Европската унија во најдобри услови“.
Тој сепак не потврдува дека март ќе има одлука на Европскиот совет и наместо тоа повтори дека за нив како одлучувачки е зацртан загрепскиот самит во мај. Но и во оваа прилика потенцира дека ЕУ ќе работи на методологијата, а како работа која Северна Македонија треба да ја заврши го споменува законот за ЈО, при што укажа дека мора да се внимава на начинот на кој тој ќе се донесе и на неговиот квалитет, како и коректно функционирање на преодната влада, без тензии и меѓусебни кавги.
„Затоа, ги повикувам големите политички партии да го имаат предвид државниот интерес, а не да влегуваат во меѓусебни расправии. Ги повикувам да донесат законот за Јавното обвинителство, кој ќе биде добар и ќе задоволува одредени критериуми и тоа да го направат без предрасуди за партијата или поради лични интереси. Сметам дека тоа ќе биде соодветно вреднувано од најголем број земји-членки на Унијата“,
порача Тимоние во интервјуто за Телма.