Претседателот наСДСМ, Зоран Заев, денеска остварил телефонски разговор со генералниот секретар на НАТО, Јенс Столтенберг, информираат од партијата.
„Столтенберг упати честитки до претседателот Заев за победата на СДСМ на предвремените парламентарни избори и изрази задоволство што во Република Северна Македонија е реизбрано политичкото раководство кое со своите храбри и исправни политики ја внесе земјата во НАТО, како 30. земја членка. Со тоа е потврдена определбата на Република Северна Македонија, како членка на Алијансата, да го продолжи реформскиот пат кој значи напредок, развој и стабилност. Особено е важно, нагласи Столтенберг, што тоа се случи по решавањето на големи проблеми на меѓународен план и по спроведувањето на значајни реформи дома, што го потврдува демократскиот капацитет на македонскиот народ“,
велат од СДСМ.
Во партиското соопштение се додава дека Заев изразил благодарност за честитките и нагласил дека на овие избори се покажа дека граѓаните ја поддржаа посветеноста и исправниот реформски курс на Владата предводена од СДСМ.
Претседателот Заев нагласи дека Северна Македонија цврсто останува посветена на демократските реформи и евроатланската ориентација.
„Двајцата соговорници се согласија дека имавме достоинствени, фер и демократски избори, како што доликува на земја членка на НАТО и на земја што почнува преговори за полноправно членство во Европската Унија. Претседателот Заев нагласи дека новата влада, предводена од СДСМ, со уште поголемо темпо ќе продолжи посветено да работи, особено на полето на економски напредок, на реформи во правосудниот систем, како и на политики кои ќе донесат развој и подобар живот за сите граѓани“,
се вели во партиското соопштение.
Генералниот секретар на НАТО Столтенберг порачал дека и во идниот период ќе продолжи соработката меѓу НАТО и Северна Македонија како членка на НАТО, но и соработката и поддршката во однос на надминување на сите предизвици од ковид-кризата.