Слаѓана Тасева од „Транспаренси интернешнл“ вели дека е потребна целосна транспарентност за процесот на набавката на кинеските вакцини бидејќи ова е од голем јавен интерес и се трошат пари на граѓаните.
Таа вели дека мора да се расчистат дилемите дали е во ред да се нарачуваат вакцини преку приватни фирми и дали тој процес е законски.
„Треба да се разјасни на кој начин се тргнало во постапка за набавка на вакцини. Сите овие информации не се добри, сите овие случувања укажуваат на една несериозност при набавката на вакцини, коишто се приоритет за било кој дел на активностите на Владата. Начинот треба да биде транспарентен бидејќи е од голем интерес на граѓаните и се трошат јавни пари. Дали е во ред да се нарачуваат вакцини од приватни компании или преку посредници во ситуацијава каде што можело да се нарача преку дипломатските претставништва и директен контакт со државите, создава непријатност, во заднина го имам прашањето дали и набавките на вакцини ќе се злоупотреби за да се оствари некаков профит или интерес и тоа мора да се расчисти за да ни ги тргнат дилемите дали ова однесување е законско“,
вели Тасева за ТВ 24.
Таа додава дека е потребно обвинителството да ги утврди пропустите.
„Во ситуацијава со набавката на вакцини, има јасна одредба во Кривичниот законик. Зачудува инертноста на ЈО, дека во ваква ситуација кога има афери и случаи, тие не се организирани да проверат. Мора да ги расчистат сите аспекти. Сите јавни документи треба да се ставени на увид на јавноста, па да се утврди дали има место за кривична одговорност. Сега да оставиме прво да се занимаваме со системот, а никој да не се занимава со аспектот на криминалот и можноста за злоупотреба е апсолутно несоодветно постапување. Оваа ситуација е несоодветна, и не слушнавме дека се случила на друго место. Немаат право да ги прикриваат информациите, целата постапка треба да е јавна“,
вели Тасева.