Разговорите меѓу СДСМ и ДУИ кои траат повеќе од една недела се театар бидејќи веќе постигнале договор, тврди градоначалникот на Гостивар, Арбен Таравари и висок функционер на коалицијата Алијанса за Албанците и Алтернатива.
„СДСМ се срами да биде во влада со ДУИ, а од друга страна, интегративците ветија дека ќе има премиер Албанец, но сега прифатија да влезат во влада без исполнување на ова ветување“,
вели Таравари во интервју за ТВ 21.
Најавува дека ДУИ може да смета на поддршката на пратениците на коалицијата Алијанса/Алтернатива само доколку го остварат ветувањето за премиер Албанец, но само со четиригодишен мандат, а не и за друг, како што вели, партиски пазар.
ДУИ денеска ги обвини останатите партии на Албанците во земјава дека им ги уништуваат преговарачките позиции ним, како на победник и легитимен претставник на Албанците, со тоа што организираат протести, а одржуваат посебни состаноци со СДСМ и ВМРО.