Во однос на изјавите на претседателот на движењето Беса и негов коалициски партнер Билал Касами, оти заминувањето на Таравари од ВЛЕН нема да има вистинска тежина и, како што додаде, „ако си замине од ВЛЕН, тогаш е нула, бидејќи нула беше кога дојде“, лидерот на дел од АА се повика на феномен од психологијата кога „устата побрзо зборува додека мозокот процесира“
Лидерите на четирите партии, кои сме дел од коалицијата ВЛЕН, сме во постојана комуникација во однос на натамошното политичко дејствување, вели претседателот на дел од Алијанса за Албанците, Арбен Таравари.
Изјавата на Таравари доаѓа откако во вторникот неговиот коалициски колега од Демократско движење, Изет Меџити, го повика да избере страна дали ќе биде со ВЛЕН или ќе преговара со Демократската унија за интеграција.
Таравари најави дека вечерва сите лидери ќе имаат состанок и изрази надеж дека ќе се изнајде најдоброто можно решение што ќе биде во интерес на сите.
„Во ВЛЕН продолжуваме со разговори. Вечерва имаме состанок, сите четири претседатели на партии, континуирано имаме комуникација, се надевам дека работните групи ќе продолжат да работат и дека ќе изнајдат најдобро можно решение, кое нема да биде фрустрирачко или демотивирачко за партиите, кои се дел од ВЛЕН“,
рече Таравари одговарајќи на новинарски прашања по работната посета на општа болница „Ферид Мурад“ во Гостивар.
Во однос на изјавите на претседателот на движењето Беса и негов коалициски партнер Билал Касами, оти заминувањето на Таравари од ВЛЕН нема да има вистинска тежина и, како што додаде, „ако си замине од ВЛЕН, тогаш е нула, бидејќи нула беше кога дојде“, лидерот на дел од АА се повика на феномен од психологијата кога „устата побрзо зборува додека мозокот процесира“.
„Во психологијата има еден феномен, кога устата зборува побрзо од мозокот, додека мозокот процесира. Се вика како феномен лапсус лингве и мислам дека господинот Билал немаше намера лошо да мисли, дека Алијанса за Албанците е нула, туку не ги стави зборовите баш како што треба во реченицата. Се надевам, мислам и сигурен сум дека нема лоши намери и не мисли така како што кажа, туку избрза со еден збор и кажа како што не треба“,
рече Таравари.
Односите меѓу Арбен Таравари и лидерите на другите партии што се дел од ВЛЕН, коалицијата која е дел од владејачкото мнозинство, се заострени во изминатиот период, а главна точка на конфликт е заедничкиот настап на претстојните локални избори и обединувањето на ВЛЕН во една партија.
Таравари, во настап во емисијата „360 степени“, јавно го критикуваше функционирањето на коалицијата и нивната ефикасност во Владата. Отиде дотаму што кажа и дека дел од директорските, па и министерските позиции, не се пополнети со соодветни кадри. Тоа само ги засили шпекулациите дека не се во прашање само локалните избори, туку дека е можен распад на коалицијата на партии на Албанците кои се во Владата. Па дури и дека Таравари договара соработка со ДУИ.
Изет Меџити на прес-конференција во Владата во вторникот истакна дека Таравари бил запознат со идејата за обединување на политичките партии од оваа коалиција во една партија.
Идејата за фузирање, како што рече Меџити, била присутна уште од самиот почеток на коалицирањето, но се чекало соодветен момент за усогласување на политичките структури, идеите и програмите за да се направи следниот чекор кон формирање еден политички субјект.
Таравари, пак, по ова изјави дека нема добиено понуда од ВЛЕН да се спојат во една партија.
За информациите дека добил понуди од ВЛЕН и од ДУИ да има 35 отсто од советничките листи и пет кандидати за градоначалници на претстојните локални избори, Таравари рече дека не преговарал со ДУИ, а од ВЛЕН добил понуда, која повеќе може да ја нарече ултиматум отколку понуда.