Лидерот на Алијанса на Албанците, Таравари, денеска беше дециден во изјавата и рече дека одлуката е партиска и на претстојните избори ќе настапат самостојно.
Оваа одлука, како што посочи тој, му била пренесена и на лидерот на ДУИ, Ахмети
Министерот за надворешни работи и портпарол на ДУИ, Бујар Османи, пак, вчера за емисијата „360 степени“ на МРТ 1 рече дека сè уште се размислува за можни предизборни коалиции, но не отфрлаат можност за коалицирање и со Алијанса за Албанците доколку од тоа може да се изгради посилна политичка платформа
Политичката партија Алијанса за Албанците (АА) на претстојните избори нема да настапи на заеднички листи со партијата Демократската унија за интеграција (ДУИ). Toa e и последната одлука на партиското раководство на АА, на следните избори да настапи самостојно, рече денеска лидерот на оваа партија, Арбен Таравари, одговарајќи на новинарско прашање за понудата на Али Ахмети за настап на Алијанса и ДУИ со заеднички листи на претстојните избори.
„Засега последната одлука на партиското раководство е на избори да одиме самостојно. Сепак, оваа одлука треба да помине и на централното собрание што ќе се одржи до крајот на оваа година, некаде во декември. Дефинитивно, Алијанса за Албанците нема да оди со ДУИ со заеднички листи и тоа му го повторив на последната средба со Ахмети. Се подготвуваме за самостоен настап и го мобилизираме членството. Тоа е мој и став на претседателството, а дали ќе се смени, тоа ќе биде јасно по седница на највисокиот орган на партијата“,
рече Таравари.
Околу прозивките кои доаѓаат од академските кругови на Македонците дека прави раздор и оживува идеи кои не ѝ носат добра иднина на државата, Таравари напомена дека како политичар има право да размислува и да артикулира решенија, а едно од можните е да се изгласаат уставните измени.
Во спротивно, како што напомена, ќе се отворат прашања кои стануваат легитимни за дискусија.
Според него, овие прашања се наметнуваат во реториката која Левица и ВМРО-ДПМНЕ што ја користат во нивните настапи.
„Често ги анализираме состојбите и легитимно е за мене како политичар да ги истакнам дилемите со кои се соочувам. Очигледно е дека по толку смени на власта во која низ годиниве учествувале речиси сите партии, не успеавме да обезбедиме и да ја најдеме формулата добро владеење и затоа ни треба некаков надворешен фактор да нè контролира. Јас потполно се согласувам со претседателот Пендаровски кога вели дека ни треба нов Устав и да се редефинираме како општество. Многу ни е важно да обезбедиме подобра иднина и просперитет“,
вели Таравари.
Тој повтори дека тоа го гледа во дводомниот парламент, поголемата фискална децентрализација, формирање на економско развојни реони кои подобро ќе ги решаваат потребите на граѓаните.
Министерот за надворешни работи и портпарол на ДУИ, Бујар Османи, вчера за емисијата „360 степени“ на МРТ 1 рече дека се уште се размислува и за можни предизборни коалиции.
„Османи: Не можам да кажам, не знам колку се созреани условите за тоа.
360°: За со СДСМ?
Османи: Да. Нема финална одлука, но зборувам за опциите што доминираат.
360°: А со Алијанса за Албанците?
Османи: Постои можност, но ќе видиме како ќе одлучат двете партии, ние сме две самостојни партии, доколку гледаме можност од тоа да се изгради посилна политичка платформа, зошто да не.“