Грков во својот исказ пред Судот на денешното рочиште уште потврди дека добивал тендери за градежни активности од Град Скопје и од други општини
Сопственикот на кавадаречката компанија „Урбан инвест“, Јован Грков, во своето денешно сведочење во случајот Талир, за незаконското финансирање на ВМРО-ДПМНЕ и перење пет милиони евра, сведочеше дека лично од обвинетите Миле Јанакиески и Кирил Божиновски пред избори добил наредба да даде 15 илјади евра.
Грков во својот исказ пред Судот на денешното рочиште уште потврди дека добивал тендери за градежни активности од Град Скопје и од други општини.
На прашање на обвинителката Ленче Ристоска дали некој од ВМРО-ДПМНЕ барал пари од него, односно од фирмата, адвокатите на сите обвинети приговараа дека прашањето е наведувачко, по што тоа беше преформулирано.
„Некаде пред изборите добив СМС-порака од Марјан, претседател на Општинскиот комитет на ВМРО-ДПМНЕ – Центар. Ми пиша дека треба да отидам во Владата. Во посоченото време отидов, ми кажаа пред која канцеларија. Почекав, ме викнаа Миле Јанакиески и Кирил Божиновски. Состанокот траеше кратко, ми рекоа дека имам обврска да дадам 15 000 евра и да му ги предадам на Марјан. Не ми кажаа зошто треба да ги дадам парите. По неколку дена, му ги дадов тие 15 000 евра на Марјан. Му ги дадов на рака. Потврда, документ не добив за парите што ги дадов“,
одговараше сведокот на прашања на Ристоска.
На прашањето, дали се спротивставил на ова барање, тој одговори со ,,не“ и додаде дека знаел оти мора да го исполни барањето.
На почетокот на денешното судско рочиште адвокатот Донче Наков беше казнет со 500 евра од страна на судијата Осман Шабани бидејќи претставникот на ВМРО-ДПМНЕ, портпаролот Наум Стоилковски поради чие отсуство беше одложено минатото рочиште, не доставил медицинска потврда како оправдување за отсуството што го најави адвокатот Наков.
„Адвокатот кажа дека ќе достави медицинска потврда до Судот како доказ за тоа што му го кажал претпоставувам клиентот – претставник на партијата. Наков тоа до денеска не го стори, а јас кажав на минатото рочиште дека давам наредба за негово полициско спроведување ако до Судот не донесете документација. Поради тоа, и претставникот беше приведен. Судот го казнува адвокатот Донче Наков со парична казна од 500 евра во денарска противвредност“,
соопшти судијата Шабани.
Обвинтелството во „Талир“ го товари поранешниот партиски лидер и премиер Никола Груевски за злоупотреба на службената положба и овластување и за перење пари и други приноси од казниво дело. Бидејќи Груевски е во бегство во Унгарија, му се суди во отсуство.
За истите две кривични дела, осомничени се и Кирил Божиновски и Миле Јанакиески, кој е во куќен притвор.
Во истиот процес Илија Димовски и Леко Ристоски се обвинети за перење пари и други приноси. За ова дело беше обвинета и Елизабета Чингаровска, која ја призна вина. Партијата ВМРО-ДПМНЕ, како правно лице, исто така е обвинета за перење пари и други приноси.