Во меѓувреме, весникот „Вашингтон пост“, повикувајќи се на неименувани американски службеници, објави дека директорот на американската разузнавачка служба ЦИА, Вилијам Барнс, во понеделникот во Кабул се сретнал со главниот политички лидер на талибанците, Абдул Дани Барадар, но ниту ЦИА, ниту Белата куќа не ја потврдуваат информацијата
САД мора да престанат со евакуација на квалификувани Авганистанци, изјави денеска портпаролот на талибанците и воедно ги предупреди западните сили дека нема да биде продолжен рокот за напуштање на земјата, 31 август.
Исламистичката група рече дека Американците земаат „авганистански експерти“, како што се инженери и бараат да го прекинат овој процес и забранија авганистаски граѓани да доаѓаат на аеродромот во Кабул.
Главниот портпарол на талибанците, Забихула Муџахид, притоа упати серија барања за време на денешниот пренос во живо, додека се интензивираат операциите предводени од САД за евакуација на илјадници луѓе од Кабул.
Портпаролот ја повтори претходната изјава на групата дека талибанците не дозволуваат САД да го продолжат рокот за целосно повлекување.
„Имаат авиони, го имаат аеродромот, треба да ги извлечат своите граѓани и изведувачи од овде“,
рече Муџахид.
Американскиот претседател Џо Бајден изрази надеж дека ќе се држи до крајниот рок до 31 август, но се соочи со притисок од европските сојузници и Британија да го помести датумот.
Според американската Влада, околу 50000 странци и Авганистанци ја напуштиле земјата преку аеродромот во Кабул, откако талибанците ја зазедоа земјата пред девет дена.
Во меѓувреме, „Вашингтон пост“, повикувајќи се на неименувани американски службеници, објави дека директорот на американската разузнавачка служба ЦИА, Вилијам Барнс, во понеделникот во Кабул се сретнал со главниот политички лидер на талибанците, Абдул Дани Барадар.
Претставниците на ЦИА и Белата куќа не одговорија на барањата на агенциите да ја потврдат таа информација.
Многу Авганистанци стравуваат од повторување на бруталното толкување на шеријатскиот закон што талибанците го воведоа кога првпат ја преземаа власта во 1996-2001 година и од одмазда за соработката со САД во изминатите две децении.