Претседавачот со конститутивната седница на Собранието, Талат Џафери, сепак, се откажал од намерата за утре да закаже продолжение на седницата, како што најави во текот на денот, дознава „360 степени“.
Не станува збор за формално откажување на продолжението, зашто Џафери претходно само го најавил утрешното заседание до собраниските служби и побарал од нив да го подготват. Се обидовме и официјално да ја потврдиме информацијата дека Собранието утре нема да заседава, но надлежните службеници во парламентот вечерва не можеа да го направат тоа.
Кој и како го премислил Џафери, засега нема информација.
Седницата ја нема ниту на собранискиот календар на официјалната веб-страница на Собранието. При изборот на утрешниот датум таму стои дека „нема закажни пленарни седници и седници на работни тела“.
Џафери попладнево прво ги задолжил собраниските служби да започнат подготовки за одржување на утрешното заседание, а подоцна во медиумите потврди дека таа ќе се одржи во 15 часот.
Тој рече дека одлучил да закаже продолжување на конститутивната седница откако претседателот на државата, Стево Пендаровски, најави дека утре ќе му го довери мандатот за формирање на Влада на лидерот на СДСМ, Зоран Заев.
„Од медиумите дознав дека Пендаровски ќе му го додели мандатот на Заев, што според Уставот значи дека Заев има мнозинство и дека е подготвен за избор на претседател на Собранието со што ќе заврши и официјално конститутивната седница и Собранието ќе биде конституирано. Затоа им дадов насоки на собраниските служби за утре да подготват продолжение на конститутивната седница“,
рече претходно Џафери во изјава за ТВ24.