Со повеќе од 1,8 милијарди луѓе во изолација, над 16 500 смртни случаи и здравствени системи на неколку земји што се на раб на колапс, пандемијата ковид-19 продолжува да претставува сериозен предизвик низ целиот свет.
Пандемијата се „забрзува“, но нејзиниот тек може да се измени, соопшти Светската здравствена организација (СЗО), повикувајќи ги државите да делуваат со тестирање на сите случаи и со карантин за сите оние кои биле во близок контакт со нив.
Вкупно 10 000 смртни случаи се регистрирани во Европа во почетокот на неделава, повеќето од нив во Италија (околу 6 000).
После неколкунеделен отпор, британскиот премиер Борис Џонсон конечно вчеравечер објави дека населението во Велика Британија мора да остане во своите домови најмалку три недели.
Во Русија, затворањето на сите образовни институции стапи на сила оваа недела. Жителите на Москва постари од 65 години се принудени да останат во своите домови.
Дека здравствените системи, вклучително и оние во најразвиените земји, се на раб на колапс покажува една симболична фотографија од Мадрид, каде тамошното лизгалиште е претворено во мртовечница: властите беа принудени да го земат просторот за да ги положат телата на речиси 500 мртви за 24 часа. Шпанија е втора најпогодена земја во Европа со вкупно 2 182 смртни случаи и повеќе од 33 000 заразени.
И неколку африкански држави од синоќа почнаа со спроведување на мерка изолација во домовите, како што е Јужна Африка, земја која е најтешко погодена од Ковид-19 на континентот, а властите дури испратија трупи на улиците на главниот град Јоханесбург.
Вонредна состојба и полициски час има во Сенегал и Брегот на Слоновата Коска. Мерки за делумно изолирање беа воведени во Алжир, главниот град на истоимената држава и регионот на Блида, што е најтешко погодено. Мерките за изолација се прогласени во главниот град на ДР Конго, и двата најголеми града на Мадагаскар, Антананариво и Тоамасина.
„Сите жители на Абуџа и Лагос мора да останат во своите домови“, напиша нигериското претседателство до жителите на главниот град, односно најнаселениот град во таа земја.
Ваквите мерки се исклучително сложени во Африка и малку се почитуваат бидејќи многу жители на тој континент треба да одат на работа за да преживеат.
Нови 78 нови случаи на инфекција со коронавирусот има во Кина, претежно увезени случаи од странство, а Кина стравува од нов бран на инфекција.
Здравствената комисија во покраината Хубеj денеска објави дека ќе ги укине сите ограничувања на патувањата, пристигнувањата и поаѓањата кон покраината почнувајќи од среда, 25 март, со исклучок на главниот град на провинцијата, Вухан, кој беше извор на пандемијата на коронавирусот.
Жителите на Вухан, градот од каде се појави вирусот во декември 2019 година, добија дозвола да се вратат во полно работно време, а знак на закрепнување е дека јавниот превоз ќе го продолжи сообраќајот по два месеци суспензија.
Економски мерки
Европската унија донесе одлука без преседан: го суспендираше Пактот за стабилност и раст, што значи дека ги олабави строгите правила за буџетска дисциплина.
Дури и Германија, која секогаш се залага за буџетското штедење, одлучи да ги укине уставните ограничувања на јавниот дефицит за да ги забрза стотиците милијарди евра потребни за да се одржи економијата. Со тоа што владата смета на „рецесија од најмалку 5 проценти“ во 2020 година.
САД ќе ги „отворат“ своите деловни пазари многу скоро, најави претседателот Доналд Трамп.
„Америка наскоро ќе се отвори за бизнис. Многу наскоро. Многу порано од три или четири месеци, како што некои посочија. Не можеме да дозволиме лекот за проблемот да биде попогубен од проблемот“, рече американскиот претседател на брифингот во Белата куќа .
И покрај фактот дека Федералните резерви (ФЕД) најавија голема помош за компаниите, светските пазари останаа немилосрдни- индексот Дау Џонс падна на најниско ниво од ноември 2016 година, а „потонаа“ и европските берзи.
Властите на Њујорк, градот во кој се наоѓа Волстрит, симбол на американскиот пазар на пари, ги повикаа сите жители да останат во своите домови, откако градот стана центар на епидемија во САД со 12 000 заразени (речиси третина од сите случаи во САД) .
Но, денеска наутро утрото берзата во Хонг Конг забележа раст од повеќе од 3 проценти.