Светската здравствена организација (СЗО) соопшти дека постои висок ризик од биоопасност во главниот град Картум откако една од завојуваните страни ја запленила националната лабораторија во која има агенси за мали сипаници и колера и протерала техничари, пренесува Ројтерс
Борбите во Судан стивнаа во текот на ноќта откако армијата и ривалските паравоени сили се согласија на тридневен прекин на огнот дозволувајќи им на повеќе Суданци да избегаат, а странските земји да ги евакуираат граѓаните.
Меѓутоа, Светската здравствена организација (СЗО) соопшти дека постои висок ризик од биоопасност во главниот град Картум откако една од завојуваните страни ја запленила националната лабораторија во која има агенси за мали сипаници и колера и протерала техничари, пренесува Ројтерс.
Војната што избувна меѓу армијата и паравоените Сили за брза поддршка (РСФ) на 15 април ги претвори станбените области во воени зони, при што загинаа најмалку 459 луѓе, а беа повредени над 4 000.
Странските земји го префрлија персоналот на амбасадата од Картум по неколку напади врз дипломати, вклучувајќи го и убиството на египетскиот аташе кој беше застрелан на пат кон работа. Некои земји извлекуваат и свои цивили.
Во вторникот Велика Британија започна голема евакуација на своите државјани со воени летови од аеродром северно од Картум. Франција и Германија соопштија дека евакуирале повеќе од 500 луѓе од различни националности и дека француски командос бил погоден во вкрстен оган за време на операцијата.
Десетици илјади луѓе заминаа во последните денови во соседните Чад, Египет, Етиопија и Јужен Судан, и покрај несигурноста на условите таму.
Ситуацијата за оние што останаа во третата по големина африканска земја, каде што на една третина од 46-те милиони луѓе им требаше помош уште пред конфликтот, брзо се влошува. Некои изразија загриженост поради заминувањето на некои меѓународни хуманитарни агенции и дипломати.
Хуманитарната канцеларија на Обединетите нации во вторникот соопшти дека ги намалила активностите поради борбите.