Светската здравствена организација (СЗО) бара воведување мораториум на вакцинацијата со трета доза против ковид-19, барем до крајот на септември, изјави денеска генералниот директор на Тедрос Аданом Гебрејесус.
Според него, ова ќе овозможи да се вакцинираат барем десет проценти од жителите во секоја земја.
„Ја разбирам загриженоста на сите администрации дека сакаат да ги заштитат своите граѓани од делта-сојот на коронавирусот, но не можеме да прифатиме дека земјите кои веќе го користеле поголемиот дел од глобалните резерви на вакцини, да земаат нови дози“,
нагласи Гебрејесус.
Минатата недела израелскиот претседател Исак Херцог ја прими третата доза од вакцината, со што започна кампања за давање дополнителна доза за лица постари од 60 години, како дел од напорите да се забави ширењето делта-сојот на коронавирусот.
САД потпишаа договор со „Фајзер/Бионтек“ минатиот месец за набавка на дополнителни 200 милиони дози за вакцинација на малолетници и, евентуално, за трета доза.