Во Основниот кривичен суд во Скопје денеска треба да се сослушаат сведоци предложени од Бојан Јовановски-Боки 13. За денеска, според првичниот план, треба да сведочат Дејан Панделевски, син на осомничениот бизнисмен во „Империја“, Цветан Панделевски, како и уште еден сведок.
Во својата листа Боки има предложено вкупно 12 имиња. Од нив досега сведочеше само адвокатот Васил Димишков, брат на судијката на претходна постапка Весна Димишкова, која постапува во предметот „Империја“.
Вчера, пак, како сведок требаше да се појави ексградоначалникот на Центар и бизнисмен Владимир Тодоровиќ и уште едно лице. Меѓутоа, рочиштето се одложи бидејќи Тодоровиќ испратил известување дека деновиве службено е надвор од државата, а вториот сведок не добил уредна покана.
Судијката Васка Николовска-Масевска, пред откажување на рочиштето посочи дека бизнисменот ќе сведочи на едно од рочиштата закажани за наредната недела, а тогаш би сведочел и Дејан Панделевски, доколку не се појави денеска.
На листата сведоци на Боки за наредната недела се и сопругот на Фросина Ременски, Јовче, и Сергеј Варошлија.
По сослушувањето на неговите сведоци судскиот процес ќе продолжи со сведоците на Катица Јанева. Таа има предложено 13 меѓу кои се и повеќето од обвинителите кои работеа во СЈО.
Јовановски во „Рекет“ е обвинет за примање награда за противзаконито влијание и за перење пари, а Јанева за злоупотреба на службената положба.