Косовскиот министер за внатрешни работи посочи дека чека што поскоро да реагира КФОР и додаде дека доколку тоа не се случи, Косово само ќе ги отстрани барикадите, а безбедносната состојба на северот на земјата оценува дека е влошена
Косовскиот министер за внатрешни работи Џелал Свечља изјави дека безбедносната состојба на северот на земјата е влошена.
Тој посочи дека чека што поскоро да реагира КФОР и додаде дека доколку тоа не се случи, Косово само ќе ги отстрани барикадите.
„КФОР бараат извесно време сами да ги отстранат барикадите. Сега чекаме да ја исполнат својата обврска. Но, откако поминаа 13 дена и имаме полицајци во Јариње и Брњак, деновите што се пребројуваат се пред крајот. Верувам дека КФОР и меѓународните фактори се решени да го направат тоа што е можно поскоро. Но, заради поголема стабилност, чекаме да го направат тие што ги поставија барикадите или КФОР. На чекањето му доаѓа крајот“,
рече Свечља пренесува регионалниот сервис на РСЕ.
Тој ова го изјави на прес-конференција во Митровица, велејќи дека условите на Србите, кои биле претставени за отстранување на барикадите, се остварување на политички цели.
На протестот во Рудар и Звечан вчера, Горан Ракиќ, претседател на Српската листа – партија која функционира на Косово со поддршка на Белград, ги претстави условите за отстранување на барикадите.
Тој побара „ослободување на уапсените Срби, повлекување на тајните списоци за апсење и пукање на Срби и повлекување на специјалните единици на косовската полиција“.
Косовскиот министер ги отфрли и тврдењата дека косовската полиција има списоци преку кои апси поранешни српски полицајци.
Свечља посочи дека Србија спроведува кампања за дезинформација за тензиите на северот на Косово, каде што живеат мнозинство Срби.
„Невистина која континуирано се изнесува е поврзана со веста дека косовската полиција има списоци врз основа на кои апси поранешни полицајци. Косовската полиција нема такви списоци, ги нема ниту за прогон, а уште помалку за убиствата на српските граѓани”,
рече тој.
Свечља додаде дека поранешниот српски полицаец Дејан Пантиќ, чие апсење поттикна поставување барикади, се наоѓа во полициската станица во близина на Лепосавиќ.
Тој оцени дека трансферот на Пантиќ во притворот е приоритет на властите и оти за тоа побарале помош од меѓународните партнери.
„Неговото пренесување преку соработка со нашите партнери останува приоритет. Отстранувањето на барикадите го овозможува овој трансфер од страна на косовската полиција, лесно и безбедно“,
рече Свечља, додавајќи дека барањето за негово ослободување за Косово е неприфатливо.
Србите на северот на Косово на 10 декември со тешка механизација ги блокираа патиштата на северот на земјата, а за да ги отстранат барикадите бараат ослободување на нивниот сонародник Дејан Пантиќ.
Свечља додаде дека мал број граѓани се во близина на барикадите.
Бидејќи барикадите ги блокираат патиштата што водат до граничните премини Јариње и Брњак – кои ги поврзуваат Косово и Србија – овие две точки се затворени за сообраќај.