Младиот пулмолог Нешковски вчера загина во сообраќајка што се случи на улицата „Рузвелтова“ во Скопје
Во дел од порталите и на социјалните мрежи се шпекулираше дека несреќата ја предизвикал возач во алкохолизирана состојба, а потоа дека на возачот му се слошило, односно доживеал инфаркт
Резултатите од обдукцијата ќе треба да дадат одговор зошто младиот лекар Трајче Нешковски вчера изгубил контрола над своето возило по што удрил во друг автомобил, а потоа и во дрво. Како последица на тоа Нешковски се здоби со тешки телесни повреди, поради што починал во Комплексот клиники „Мајка Тереза“ каде што бил пренесен по сообраќајната несреќа што се случи на улицата „Рузвелтова“ во Скопје.
По несреќата, во дел од медиумите и на социјалните мрежи се објавуваа различни шпекулации во врска со сообраќајката. Без официјална потврда, дел од веб-порталите првично објавуваа дека несреќата ја предизвикал возач во алкохолизирана состојба, а потоа дека на возачот му се слошило, односно дека доживеал инфаркт.
Од Институтот за судска медицина за „360 степени“ велат дека по барање на Основното јавно обвинителство – Скопје се земени потребните материјали за обдукција.
„Земени се примероци од урина, крв и други материјали кои треба да се испитаат со цел да се утврди причината како настапила смртта. Комплетните резултати ги очекуваме да бидат готови за максимум еден месец, по што ќе ги доставиме до Обвинителството“,
вели директорот на Институтот за судска медицина Александар Станков за „360 степени“.
Од Министерството за внатрешни работи, денеска официјално соопштија дека вчера во 16:45 часот била пријавена сообраќајна незгода што се случила на улицата „Франклин Рузвелт“ помеѓу патничко возило „ситроен“, со гостиварски регистарски ознаки, управувано од Т.Н.(32) од Гостивар и патничко возило „опел“, со струмички регистарски ознаки, управувано од Г.К.(34) од с.Просениково, струмичко.
„Т.Н. се здобил со тешки телесни повреди по што бил пренесен на Комплексот клиники ‘Мајка Тереза’, каде што починал. Со телесни повреди се здобила Г.К., констатирани во Градската општа болница ‘8 Септември’. Извршен бил увид на местото на незгодата од увидна екипа од СВР Скопје и јавен обвинител, по чија наредба телото на починатиот е предадено за обдукција“,
се вели во полицискиот билтен.
Триесет и двегодишниот пулмолог Нешковски бил активен и во Социјалдемократската младина, а многумина од неговите сопартијци, како и членови на Владата изразија сочувство, меѓу нив и премиерот Зоран Заев.
„Длабоко ме погоди веста за смртта на нашиот сопартиец, млад доктор, пулмологот Трајче Нешковски, долгогодишен член на СДСМ и доскорашен секретар на Социјалдемократската младина. Жално е кога смртта нѐ разделува од пријателите и соработниците, а посебно е тажно кога прерано ќе заврши животот на некој толку успешен и млад човек. Трајче ќе остане запаметен како голем човек, борец за својата земја, за граѓаните, за социјалдемократските вредности, успешен доктор и човек кој силно го сакаше својот роден град, Гостивар“,
напиша премиерот Заев на Фејсбук.