Споменатиот коментар за Зеленски го дала на келнерка во мензата во медицинскиот центар каде што била гостин минатиот Божиќ
Судот во Москва казни руска пензионерка која го опиша украинскиот претседател Володимир Зеленски како „убав млад човек со добра смисла за хумор“, објави руската организација за човекови права Меморијал. Седумдесетгодишната Олга Слегина од градот Налчик на југот на Русија беше обвинета за „дискредитација на руските вооружени сили“.
Споменатиот коментар за Зеленски го дала на келнерка во мензата во медицинскиот центар каде што била гостин минатиот Божиќ. Кремљ воведе сеопфатни закони за цензура веднаш по започнувањето на воената инвазија на Украина минатиот февруари. Минатиот месец, претседателот на долниот дом на рускиот парламент, Вјачеслав Володин, рече дека го заострува законот за „да ја обезбеди безбедноста на земјата и нејзините граѓани“.
Во Русија, „дискредитирањето“ на војската претходно беше казниво со до пет години затвор, додека свесното ширење лажни информации за тоа може да резултира со 15-годишна затворска казна. Володин воведе измени на законот за кои рече дека ќе донесат максимални казни од 15 години затвор за двете кривични дела, пишува Индипендент.
Зборувајќи за Зеленски, Слегина рекла и дека сите се смееле на шегите на Зеленски, што во полиција го пријавиле уште тројца посетители на кафулето. Меморијал наведува дека полицаецот кој ја уапсил пензионерката рекол:
„Немате право да го фалите бидејќи тој е наш непријател“.
Меморијал тврди дека Слегина, која има проблеми со видот, била измамена да потпише изјава во која тврди дека извикувала „Слава на Украина“. Судот во Москва ја казни Слегина со 40 000 рубљи. Повеќе од 20 000 луѓе, вклучително и деца, беа уапсени во Русија поради протести против војната.