Единствен што гласаше против за изборот на судијката Снежана Манев за претседател на Основниот суд Куманово беше членот на Судскиот совет Миљазим Мустафа, кој за разлика од неговите колеги кои рекоа дека таа како в.д. претседател добро го менаџирала судот, рече дека гласал „против“ затоа што извештајот од контролата на овој суд бил негативен и меѓучовечките односи во него биле на најниско можно ниво
Инаку, на денешната седница Судскиот совет за претседател на Апелацискиот суд Скопје ја избра судијката Мери Дика, која досега ја извршуваше функцијата в.д. претседател на второстепениот суд
Судскиот совет на денешната седница ја избра судијката Снежана Манев за претседателка на Основниот суд Куманово, функција која ја извршуваше и досега, но како вршител на должност.
Инаку, судијката Манев летово беше во фокусот на јавна преписка меѓу Судскиот совет и министерот за правда Кренар Лога, која тој ја иницира реагирајќи на тоа што на судијката ѝ била дадена можност по вторпат да полага психолошки тест.
За изборот на Манев за претседател на кумановскиот суд „за“ гласаа деветмина члена на Судскиот совет, а еден беше против. Таа ја доби поддршка и на гласањето според Бадентеровиот принцип, односно од четири гласа, за нејзин избор гласаа тројца, а е еден член на Советот беше против.
Судијката Снежана Манев беше единствен кандидат за претседател на Основниот суд во Куманово.
Членката на Советот, која е и координатор на кумановскиот суд, Антоанета Димовска, пред гласањето рече дека е запознаена со написите во јавноста за кандидатката, но посочи дека до Судскиот совет не стигнал никаков документ со факти, кој би бил причина таа да гласа против судијката Манев.
„Јас сум координатор на Основниот суд Куманово, но морам да кажам дека предложениот кандидат не го познавам. Го запознав кога дојде тука на интервју, се видовме на пет минути, така што не можам да кажам ништо лично по однос на тоа каков кандидат е, но во врз основа на тоа што го гледам како документација, таа ги исполнува условите. Знам дека во јавноста имаше, следев и претходно кога не бев член на Судскиот совет разни написи, но никаков документ со факти не е стигнат до Судскиот совет за да јас гласам против кандидатот. Но секако, ако секој кандидат биде избран и ако има причини да биде разрешен, може да биде и разрешен. Во овој момент јас не гледам причина да овој кандидат не биде ставен на гласање и не биде изгласан за претседател на Основниот суд Куманово. Јас како координатор ќе ја следам работата на тој суд бидејќи тоа е моја обврска“,
рече Димовска.
Позитивно за работата на судијката се изјасни и нејзината колешка Весна Дамева, која рече дека фактите зборуваат дека овој суд бил добро менаџиран од кандидатката во претходниот период кога била претседател, а потоа и в.д. претседател на кумановскиот суд.
„Имајќи предвид дека во 2022 година со оглед на енормно големиот број на примени предмети, тој прилив на предмети е совладан и судот е ажурен, што значи дека една од причините, покрај напорот на судиите е и доброто менаџирање. И втор факт покрај оние квантитативни и квалитативни резултати коишто ги има Судот, а се изменаџирани од овој судија во својство на вршител на должност во последниот период е и дека оној пожар кој што беше настанат пред извесен период и покрај тоа што беше од поголеми размери не го закочи нормалното функционирање на овој суд и овие причини за мене се доволни аргументи да дадеме шанса на овој кандидат да стане претседател на судот бидејќи верувам дека истиот добро ќе менаџира“,
рече Дамева.
Таа укажа, како што рече, и на фактот дека на огласот првично биле пријавени двајца кандидати, но едниот премолчено се откажал и не се пријавил на полагање.
„Тоа што никој од другите судии не се пријавил за претседател на овој суд ми дава за право барем јас лично да сметам дека генерално се задоволни од менаџирањето на овој судија, како претседател, а потоа и како в.д. претседател“,
додаде Дамева.
Инаку, членот на Судскиот совет кој гласаше против изборот на Манев беше Миљазим Мустафа, кој по гласањето образложил зошто својот глас го дал „против“.
„Јас гласав против бидејќи имаме негативен извештај при посетата и контролата на Основниот суд Куманово, која е направена во периодот кога сега избраниот кандидата за претседател на Судот бил в.д. претседател на Судот. Исто така имаме сериозни најави за недобро менаџирање со судот, меѓучовечките односи во овој суд се на најниско можно ниво, а тоа го кажале и вработените и судиите и лицата коишто имаат контакти со овој суд. Затоа и гласав против, меѓутоа на избраната претседателка и посакувам среќа и добро здравје“,
рече Мустафа.
За судијката Манев неодамна, односно кон крајот на август, преку писмено соопштение реагираа од Министерството за правда. Имено, оттаму информираа за писмен допис од ресорниот министер Кренар Лога до Судскиот совет со кој тој бара Советот да постапи согласно законските надлежности во врска со мислењето дадено од страна на Институтот за социолошки и политичко-правни истражувања-Скопје, за судијката Манев повторно да има право да полага психолошки тест за личност и тест за интегритет. Лога во дописот укажал дека со ваквото постапување се создава нова незаконска пракса за лице што веќе еднаш не го положило тестот да добие можност повторно да го полага.
На наводите од Лога веднаш реагираа од Судскиот совет, од каде рекоа дека се зачудени од барањето на Лога, бидејќи како што оцениле од Советот министерот ги прозвал за прашање кое е во надлежност на Институтот за социолошки и политичко-правни истражувања-Скопје.
Инаку, тоа не беше првпат министерот за правда да реагира до Судскиот совет во врска со судијката Снежана Манев.
Од Министерството за правда на 11 јули соопштија дека Судскиот совет со месеци одолговлекува и не презема мерки за санкционирање и одговорност за тогаш в.д. претседателката на Основниот суд Куманово за констатирани неправилности со АКМИС. Оттаму тогаш посочија дека министерот за правда Кренар Лога во неколку наврати испратил писмен допис до Судскиот совет во кој се бара преземање соодветни мерки или дејствија по однос на констатираните наводи, објавени во извештај уште на 1 февруари годинава.
Од Судскиот совет тогаш одговорија дека АКМИС е во надлежност на ресорното Министерство за правда кое врши редовни и вонредни контроли на судовите и доколку се констатирани одредени отстапувања и неправилности, министерството може да изготви извештај и да иницира соодветна постапка.
Инаку, на денешната седница Судскиот совет за претседател на Апелацискиот суд Скопје ја избра судијката Мери Дика, која досега ја извршуваше функцијата в.д. претседател на второстепениот суд. Претседатели добија и Основните судови во Битола и Прилеп, со кои, псоред денешната одлука на Советот, ќе раководат Татјана Петровска, односно Јасмина Шишковска-Стојковиќ.
Судскиот совет одлучи во основните судови во Велес, Делчево, Крива Паланка и Штип функцијата да ја вршат досегашните в.д. претседатели сѐ до изборот на нови претседатели.
Во Основниот суд во Велес в.д. претседателка останува Лидија Димова, во Делчево – Миле Георгиев, во Основниот суд во Крива Паланка – Љубица Цветковска-Стојановска и во Основниот суд во Штип – Ѓорѓи Андонов.