Јовановски рече дека има многу што да каже во својот исказ, но инсистираше дека прво треба како докази да се покажат пораките од неговиот мобилен од ватсап-комуникацијата и да се сослушаат сведоци, а потоа тој да даде исказ
Судијката, пак, рече дека одбраната повеќе од седум месеци ги има доказите, а на тврдењата дека не може да дојде до пораките, одговори на тој начин што во судница донесе лаптоп и вработен во ИТ-секторот во судот за да покаже дека не е така
Сè додека материјалните докази, содржината од ватсап-комуникацијата од телефонот на Бојан Јовановски не бидат екстрахирани во законски предвидена форма и изведени како доказ во оваа постапка, ние како одбрана нема да даваме исказ.
Со вакво барање денеска во судница настапија првообвинетиот во случајот „Меѓународен сојуз“, Бојан Јовановски – Боки 13 и неговиот адвокат Сашко Дукоски на рочиштето на кое обвинетите треба да дадат своја одбрана односно исказ. Адвокатот рече дека ова не треба да се третира дека Боки ќе се брани со молчење туку дека едноставно сметаат оти е беспредметно тој да дава исказ ако не се прифати нивното барање бидејќи нема да помогне во утврдување на фактичката состојба.
На него се надоврза и Јовановски кој рече дека доколку прво не се изведат пораките тогаш неговата гола одбрана, која нема да биде поткрепена со круцијалните докази што се наоѓаат во неговиот мобилен телефон, би била нецелосна и ќе служи само како алиби дека е дадена одбрана за евентуалната судска пресуда.
„Сметам дека, како за одбраната така и за судот, е важно точно утврдување на фактичката состојба за овој настан. Потенцирам дека како првообвинет имам и тоа како што да кажам во својот исказ кој ќе биде сеопфатен и исцрпен“,
зборуваше Јовановски обидувајќи се да го убеди судот да ја промени одлуката, односно прво да се изведат пораките и да се сослушаат сведоците, па потоа тој да даде исказ.
Ценам, рече обвинетиот, дека ќе докажам оти на оваа обвинителна клупа им се суди на луѓе кои наводно сториле измама, а всушност тие се измамени од високопозиционирани политички лица на функции.
Тој ја убедуваше судијката Софче Гаврилова-Ефремова дека доколку им го даде телефонот тие ќе успеат да ги извадат пораките од „Ватсап“ за три до седум дена.
По барањата на Јовановски и неговиот адвокат, долго објаснување даде и судијката. Потсети дека телефонот е одземен во постапката за „Рекет“ и е веќе вештачен од Секторот за компјутерски криминал и дигитална форензика при МВР. Материјалите, тврдеше судијката, на одбраната ѝ биле дадени уште на 11 јуни 2021. Откако Боки беше префрлен во затворот „Идризово“ за издржување на затворската казна во „Рекет“, судот, рече Гаврилова-Ефремова, овозможи материјалните докази извадени од телефонот да може да се внесуваат во затворот за тој и неговата одбрана да може да ги анализираат и селектираат, а за таа цел им било дозволено да користат и свој лаптоп.
Судијката објасни дека потоа на крајот на ноември одбраната го известила судот дека материјалите се обемни и оти не можат да пристапат до ватсап-комуникацијата, за што таа се обратила и до МВР. Од Секторот за компјутерски криминал и дигитална форензика, според изнесеното, пак, кон крајот на декември било дадено упатство како да се направи тоа.
На крајот од своето излагање, судијката порача дека судот цени оти одбраната намерно одолговлекува.
„По изнесениот одговор од одбраната дека е невозможно со дадените насоки од Секторот за компјутерски криминал и дигитална форензика да се пристапи до ватсап-комуникацијата, во мојата канцеларија повикав лице од Компјутерскиот сектор во судот за да провериме дали се точни наводите од одбраната“,
рече судијката укажувајќи дека таа со вработениот во судот, следејќи го упатството, успеале да дојдат до пораките.
По ова, таа и во судница со лаптоп и проектор покажа дека тоа е можно, на што жестоко се спротивставија од одбраната.
„Ова е незаконска постапка“, реагираше Јовановски, како и неговиот адвокат кој укажуваше дека пристапувањето своеволно до пораките од страна на судијката и вработен во судот не е согласно законските одредби.
Во предметот „Меѓународен сојуз“, Бојан Јовановски, кој како претседател на невладината организација е првообвинет и се гони за делата измама и перење пари. Обвинета е и заменик-претседателката Јасна Мандиќ-Ерцеговиќ и асистентката на Боки, Христина Блажевска. Двете се обвинети за помагање во овие дела. На обвинителна клупа седи и експратеничката Фросина Ременски која се товари за помагање во делото измама. Таткото на Боки, Миле Јовановски, пак, е петтообвинет за помагање во перењето пари и за делото неовластено изработување, држење, посредување и тргување со оружје бидејќи при претрес во неговиот дом биле пронајдени три полуавтоматски пиштоли и муниција за кои немал дозвола. Како правно лице обвинета е и невладината организација.
Во овој предмет обвинителството тврди дека двајцата бизнисмени Силјан Мицевски и Ардијан Амзоски биле доведени во заблуда и измамени со проекти за изградба на Европски центар за возрасни лица и мобилни сервиси, па преку Македонската авторска агенција исплатиле речиси еден милион евра, Мицевски сума од 719 905, а Амзоски 233 821 евро.
Фото: МИА/Архива