Овој процес беше подолг период во прекин, откако Основниот кривичен суд – Скопје информира дека по препорака од психијатар се одложуваат повеќе расправи за случајот со Мухамед Зеќири
Поради истек на време и промена на членови на Судечкиот совет, судењето на поранешниот генерален секретар на Владата, Мухамед Зеќири, кој се товари за „злоупотреба на службена положба и овластување“ во Основниот Кривичен суд – Скопје, денеска започна од почеток.
Овој процес беше подолг период во прекин, откако Основниот кривичен суд – Скопје информира дека по препорака од психијатар се одложуваат повеќе расправи за случајот со Мухамед Зеќири.
Обвинителството го товари Зеќири дека во периодот од април 2021 до јануари 2022 година во својство на генерален секретар на Владата, без да спроведе јавна набавка, склучил договори за консултантски услуги со фирма во вкупна вредност од речиси еден милион евра, односно биле платени 147 000 евра повеќе од претходно договорените 795 000.
Тој се гони за склучување два договори во четири очи за консултантски услуги – едниот за определување модел за реструктуирање на АД „Пошта“ и вториот договор за консултантски услуги за поддршка на процесот за потенцијална приватизација на „Железници“.
Обвинителката Катерина Коларевиќ смета дека во судскиот процес ќе успее да докаже дека поранешниот генерален секретар на Владата ја злоупотребил службената положба и овластувања и убедена е дека тој требало да распише тендери, додека Зеќири рече дека не се чувствува виновен и смета дека не го прекршил Законот за јавни набавки.
На 9 април минатата година на Зеќири му беше одредена мерка притвор, која поради здравствени причини во јуни годинава му беше заменета со домашен притвор.
Процесот го води судијката Фанка Јанчулева Михаиловска.
ПОВРЗАНИ ВЕСТИ:
Зеќири ги побара Битиќи, Бочварски и Макрадули за сведоци во судскиот процес против него