Според најавите од ресорното министерство, извештајот од оваа стручна комисија се очекува да биде готов за десетина дена
Ќе формира стручна комисија која ќе треба да го разгледа начинот на лекување на родилката од Делчево, која на 26 декември минатата година почина на КАРИЛ во Скопје, а била донесена во лоша здравствена состојба од Клиничка болница во Штип, соопшти денеска кабинетот на министерот за здравство Фатмир Меџити.
Оттаму посочуваат и дека формирањето на стручната комисија е по препорака на Државниот санитарен и здравствен инспекторат (ДСЗИ).
Оваа комисија треба да установи и дали се направени пропусти во лекувањето на родилката.
Според најавите од ресорното министерство, извештајот од оваа стручна комисија се очекува да биде готов за десетина дена.
Инспекторите на ДСЗИ веднаш извршија увид во Клиничка болница-Штип и КАРИЛ-Скопје, а на 29 декември 2023 преку пишано соопштение информираа за направениот увид на двете клиники во земјава.
Раководството на Клиничката болница-Штип на 28 декември преку соопштение информира за редоследот на настанот и што се случувало на Одделението за гинекологија и акушерство. Во него стои и дека според Комисијата за контрола на квалитет и етички прашања на Клиничка болница-Штип нема пропусти во третманот на пациентката.
„Бидејќи секако овој случај ќе биде предмет на анализа на институции кои ја контролираат нашата работа, ќе почекаме да видиме, што е причината за ваквиот исход и дали од наша страна е постапено според медицинските протоколи и медицина базирана на докази“,
стоеше во соопштението на Клиничка болница-Штип.
Новороденчето на 26-годишната родилка е на Одделот за интензивна нега на Детската клиника во Скопје. Директорката на Детската клиника, Валентина Цвејоска-Чолаковска, вели дека е подобрена здравствената состојба на новороденчето и не е на механичка вентилација.
„Новореденото сè уште е на Одделот на интензивна нега и терапија, но подобрено е и веќе не е на механичка вентилација. Терапијата и интензивното следење продолжува, на Одделот за интензивна нега. Очекуваме во следните денови да биде префрлено и на одделот за неонатологија,
вели директорката на Детската клиника во Скопје.
При надзорот на ДСЗИ, како што соопштија оттаму, констатирано е дека пациентката која во моментот била во 39. недела од бременоста, со упат од матичниот гинеколог на 26 декември отишла на гинеколошки преглед во штипската болница, во добра општа состојба.
Прегледот покажал дека кај родилката има намалување на плодовата течност, поради што веднаш е примена на акушерското одделение за следење сè до породувањето.
Утврдено било зголемено количество на крв и коагулуми во стомачната празнина поради што хируршка екипа извршила итно извлекување на плодот. Родено е живо женско дете со низок Апгар (метода за првична проценка на здравствената состојба на новороденчето).
Поради влошување на хеморагичната шокова состојба на пациентката, колегиумот доктори (специјалисти по гинекологија, хирургија и анестезија) одлучуваат пациентката со болничко возило да биде пренесена на понатамошно лекување на Клиниката за анестезија, реанимација и интензивно лекување (КАРИЛ) во Скопје, каде починала вечерта на 26 декември по неуспешната реанимација.