Генералниот секретар на НАТО, Јенс Столтенберг во изјава за германскиот весник „Велт ам Зонтаг“ рече дека Алијансата е спремна да го одржи мирот на Косово и дека нема да дозволат враќање на насилството што го зафати регионот во 1990-тите. Тој ги повика Србија и Косово да се вратат на преговорите со помош на ЕУ, нагласувајќи дека тоа е единственото остварливо средство за постигнување траен мир во регионот.
„Сакам да кажам дека силите на НАТО се подготвени да го зачуваат мирот на Косово“, рече Столтенберг, додавајќи дека е длабоко загрижен за моменталната ситуација“,
рече Столтенберг.
Претходно денеска, министерот за внатрешни работи на Косово, Џељаљ Свечља, објави дека зад нападот во Бањска на 24 септември стои Милорад Јевтиќ кој важи за еден од најблиските соработници на Данило Вучиќ, синот на српскиот претседател Александар Вучиќ.
На социјалната мрежа Фејсбук, Свечља објави неколку фотографии од косовската лична карта и српската возачка дозвола на име на Милорад Јевтиќ, но и запленето возило со белградски таблички, за кое Приштина тврди дека е во негова сопственост.
„На местото каде што се случи нападот, полициските единици ги пронајдоа личните документи и автомобилот на Милорад Јевтиќ, што докажува дека тој бил во единицата што ја нападна косовската полиција. Терористот Милорад Јевтиќ е познат како еден од најблиските соработници на Данило Вучиќ, синот на српскиот претседател Александар Вучиќ“,
вели Свечља.
Свечља обвини и дека во последните пет посети на Данило Вучиќ на Косово, тој и Јевтиќ четири пати биле заедно во ист автомобил, за што како доказ објави извод од записниците на косовската полиција од граничните премини.
„Исто така, Милорад Јевтиќ е идентификуван како еден од напаѓачите на војниците на КФОР на 29 мај во Звечане. Останува безбедносните органи и истрагите да откријат дали покрај Вучиќ и високите српски државни структури, во планирањето и организирањето на терористичкиот напад во Бањска и Звечане бил вклучен и неговиот син“,
напиша министерот.
На ова веднаш жестоко реагираше претседателот на Србија и татко на Данило, Александар Вучиќ, кој изјави дека „единствениот терорист на Косово е Албин Курти, кој го убива и тероризира српскиот народ“.
Вучиќ реагираше на обвинувањата на министерот за полиција на Косово, Џељал Свечља, против својот син Данило.
„Курти вечерва го обвини моето семејство, мојот првороден Данило, тој самиот не знае како дошол до ова, дека некако учествувал во, како што вели, терористичкиот напад во Бањска. Првата карактеристика на кукавиците што ја забележува секој е кога некој ги напаѓа туѓите семејства, децата, бидејќи тие секогаш изгледаат како најлесните мети. Данило, се разбира, нема ништо со ништо, освен што ги сака Србија и Косово и Метохија како дел од неа, во согласност со Повелбата на ОН“,
напиша Вучиќ.