Стоилковски ги повика Лотарија и институциите да одговорат дали веќе е склучен договор со фирма која е поврзана со Васил Божков, познат како Черепот во Бугарија
Владата и вицепремиерот Артан Груби сè уште молчат за можноста Македонија да биде 15 години партнер со најголемиот бугарски мафијаш, притворен, човек со докази за контакти со Пригожин, човекот на Путин, според бугарскиот обвинител, Македонија да ја направат партнер со човек од црната листа на САД заради криминал, корупција, подмитување министри и функционери за да му минуваат законите за коцкање во Бугарија, изјави денеска на прес-конференција портпаролот на ВМРО-ДПМНЕ, Наум Стоилковски.
„Ај што молчи Груби, ај што молчат ДУИ и Владата, молчат и институции како ЈО. По две години неуспешни обиди да го сменат Законот за игри на среќа, Груби со владин потпис одобрува на Државна лотарија, каде што директор е негов личен шеф на кабинет, човек од доверба, за три нови лиценци фирми за коцкање, фирми во ортаклук со Македонија. Лотарија на Македонија објавува оглас на 11 септември со важење до 23 октомври! И во тој оглас се прави фоторобот на посакуваната коцкарница – да е странска, присутна на Балканот, да работи 8 години, да направила огромен капитал од онлајн коцкање. Сè на сè, убаво скоцкан оглас“,
посочи Стоилковски.
Според овој оглас, како што нагласи тој, сѐ упатува на бугарскиот коцкарски могул, Васил Божков-Черепот.
„Тој и дури 58 негови фирми поврзани со него од 2021 година се на црната листа на САД. Како најпознати коцкарници на интернет се 7777.бг односно 8888.бг кои од 2021 година одат во рацете на друг, се верува дека станува збор за близок на Божков, според пишувањето на бугарските медиуми, кој избега во Дубаи. Ова е информација од декември 2021 година, додека сега годинава, летово кога се враќа назад и е во притвор во Бугарија тој ги презема повторно фирмите. Ова е информација 9 август 2023 година веројатно по системот на Ковачевски и Заев, чувари на фотелји“,
рече портпаролот на ВМРО-ДПМНЕ.
Стоилковски ги повика Лотарија и институциите да одговорат дали веќе е склучен договор со фирма која е поврзана со Васил Божков познат како Черепот во Бугарија.
„Почитувани, Македонија тоне во сиромаштија, а Владата ја интересираат само закони за марихуана и закони за коцкање и закони зад кои лежат огромен потенцијал за криминал и корупција! Само избори се спасот“,
порача Стоилковски на прес-конференцијата.