„Самит на ЕУ без Ангела е како Рим без Ватикан или Париз без Ајфеловата кула“, рекол претседавачот на Самитот Мишел откако 26-те колеги на Меркел ја поздравиле со стоечки овации
Меркел присуствуваше на 107 самити на ЕУ на кои беа забележани некои од најголемите пресврти во поновата европска историја, вклучувајќи ја должничката криза во еврозоната, приливот на сириски бегалци, „брегзит“ и создавањето на историскиот фонд за закрепнување од ковид-пандемијата.
„Вие сте споменик“, рекол домаќинот на самитот, шефот на Европскиот совет, Шарл Мишел, во знак на почит кон неа, дознава Франс прес од сопствени извори.
„Самит на ЕУ без Ангела е како Рим без Ватикан или Париз без Ајфеловата кула“,
рекол Мишел откако 26-те колеги на Меркел ја поздравиле со стоечки овации.
Тој на Меркел ѝ го предал подарокот кој според изворот бил опишано како „уметничка интерпретација“ на зградата на Европа, современа градба во форма на коцка со стаклена фасада, каде што се одржуваат самитите.
Луксембуршкиот премиер Ксавиер Бетел ја нарекол Меркел „машина за компромиси“ која „секогаш наоѓаше нешто да нѐ обедини“ преку маратонските преговори внатре во ЕУ.
„Таа 16 години навистина остави свој белег во Европа, помагајќи ни на сите 27 членки да донесеме правилни одлуки со многу хуманост во моменти кои беа тешки“,
нагласил белгискиот премиер Александар де Кро.
Литванскиот претседател Гитанас Науседа рекол дека се надева дека Меркел, која е голем политичар, ќе остане на политичката сцена во една или во друга форма.
Таа на нејзиниот последен самит во Брисел, како што пишува „Франс 24“, уште еднаш се потпре на своите вештини за преговарање за да го олесни горливиот спор со Полска околу нејзиното отфрлање на правниот поредок на ЕУ – нешто што многумина веруваат дека може да биде следната егзистенцијална закана за Европската Унија. Уште една значајна тема на овој самит ќе биде и мигрантската криза.