Ставот за прегласувањетo на седум избирачки места ДУИ ќе го формира со коалициските партнери од „Европски фронт“

Според лидерот на ДУИ, Али Ахмети, прегласувањето има ризична позадина која нема да се реализира

Ставот во врска со прегласувањето на седум избирачки места за парламентарните избори ќе биде изграден заедно со сите партии од „Европскиот фронт“, одлучи ДУИ на денешниот состанок на Претседателството на партијата во тетовска Мала Речица.

„Денеска ги разгледувавме сите политички случувања, особено внимание предизвика изборниот инженеринг. И пред да се поднесуваат приговорите ние ја известивме јавноста бидејќи имавме информации од прва рака во што се состои политичкиот дил. Ги известивме сите граѓани, нашите партнери, тоа се потврди со конкретни дела и во Државната изборна комисија, но и во Управниот суд. За натамошните чекори претседателот Ахмети ќе има координативни средби со сите политички партии кои го сочинуваат ‘Европскиот фронт’. Така што, нема што повеќе да додадеме освен тоа што претседателот Ахмети веќе го сподели со сите вас и пред почетокот на денешниот состанок“,
изјави портпаролот на партијата Арбр Адеми по состанокот.

Пред состанокот, лидерот ДУИ, Али Ахмети, истакна дека ќе прават анализа на одлуките на ВМРО-ДПМНЕ и СДСМ за да се повторат изборите на неколку изборни места.

„Овој момент доаѓа по анализа на одлуките на ВМРО и СДСМ за повторување на изборите на овие изборни места, со цел да се спојат за ’Европскиот фронт’ да не биде втора сила во земјата. Ова е направено од двете најголеми партии од македонска националност, од кои политики, за жал, се плашиме дека ќе има влијание и на меѓуетничките односи кои ние не ги посакуваме“,
рече Ахмети.

Според Ахмети, прегласувањето има ризична позадина која нема да се реализира.

„Ние ќе правиме анализа. Исто така ова повторување што ќе се прави, се прави со една ризична позадина, ние Албанците да се убиеме, како што се случи на едно изборно место во Општина Желино, тоа не го посакуваме, ниту, пак, ќе се случи. Ако некој има стратегија да пукаме ние Албанците меѓу себе, нема да се реализира“,
додаде претседателот на ДУИ.

Држвната изборна комисија на денешната седница утврди дека ќе има прегласување на седум избирачки места во петтата и шестата изборна единица и тоа ќе се одржи на 22 мај. ДИК едногласно го донесе заклучокот за објавување на конечните резултати и распределба на пратеничките мандати по изборни едници, а ги потврди и претходно донесените решенија за прегласување во избирачките места 1194 и 1202 во Крушево, 1470 и 1470/1 во Долнени, 1844 во Струга, 1272 во Охрид и и 2101 во Желино.

Во однос на одлуките на Управниот суд, членот на ДИК, Борис Кондарко кажа дека станува збор за потврда на фактот што и покрај дневната политика, институциите постапуваат според своите законски надлежности и фактите кои произлегуваат од материјалните докази со кои располагаат.

Управниот суд вчера ги отфрли како неосновани сите седум тужби од коалицијата „Европски фронт“ предводена од ДУИ, поднесени против решенијата на Државната изборна комисија поврзани со изборите одржани на 8 мај. Од коалицијата „Вреди“ ја поздравија одлуката оценувајќи дека е во согласност со волјата на граѓаните, а од „Европскиот фронт“ претходно обвинија за изборен инженеринг кој, како што рекоа, има за цел да го промени односот на бројките во Собранието преку политички договор.

Управниот суд ги одби сите седум тужби на „Европскиот фронт“ – ќе има прегласување на избирачките места

Мнозинството членови на ДИК вчера преку писмена реакција до медиумите се пожалија на јавни политички притисоци и закани за кривична одговорност поради нивните одлуки по приговорите за парламентарните избори.