Извештајот дека во јавниот сектор се вработени 132 900 лица, кој вчера го презентираше министерот Дамјан Манчевски, претставува историски најголем број што некогаш го имал јавниот сектор земјава, вели дополнителната заменик-министерка за информатичко општество и администрација од ВМРО-ДПМНЕ, Невенка Стаменковска-Стојковски.
„Селективните информации во извештајот воопшто не ја прикажуваат моменталната реална состојба на бројот на вработените во јавниот сектор. Имено, најголем дел од постапките за вработување на 4 400 огласи кои беа објавени во ноември и декември минатата година завршија во јануари пред распуштањето на Собранието и тие вработувања не се дел од извештајот. Понатаму, овој извештај не ги брои ниту вработувањата од двата огласи на ЈП ‘Македонски шуми’ во јануари 2020 година за вработување на над 540 лица, ниту вработувањата од огласот Македонска пошта во февруари 2020 година за 280 лица“,
вели Стаменковска-Стојковски.
Таа посочува и дека во извештајот на Манчевски ги нема ниту вработувањата од јануари во Комунална хигиена, Градски паркинг во Скопје, Водовод Прилеп, Паркови и зеленило и на многу други институции за кои јавноста е запознаена.
„Во извештајот недостасуваат и клучни информации кои се намерно изоставени, како на пример за вкупниот број на вработени на определено време, кој според мои сознанија во моментов изнесува над 14 илјади лица. За среќа, содржи доволно информации за да обелодени класична злоупотреба и партизација на институциите, за која ВМРО-ДПМНЕ ќе спроведе ревизија и ќе одговараат сите раководители кои со средства од буџетот се раздолжувале на партиски активисти преку неосновано склучување на договори на определено време“,
посочува дополнителната заменик-министерка.
Таа обвинува и за 3 222 лица ангажирани преку агенциите за привремени вработувања, прашувајќи дали е оправдано за нивниот ангажман од Буџетот да се одлеваат 30 милиони евра.
Дополнително, според неа, од извештајот се открива дека за само две години бројот на институции пораснал за 25.
„Ова значи 25 нови директори, 25 шофери, 25 секретарки, 25 објекти, стотици нови службени телефони, стотици нови раководители на сектори и одделенија, илјадници нови партиски војници на товар на буџетот“,
вели Стаменковска-Стојковски.
*Поврзани вести: Манчевски го преброја јавниот сектор: Има 132 900 вработени, од нив јавна администрација се 16 522