Како синдикат бараме повлекување на ваквиот предлог-закон за да биде доработен без сите негативни ефекти кои ќе ги предизвика, во консултации со претставниците на работниците, синдикатите и експерти од Меѓународната организација на труд и други чинители преку инклузивен процес
Предлог-законот за системот за плати во јавен сектор, кој Министерството за информатичко општество и администрација го постави на ЕНЕР пред новогодишните празници е спорен за Сојузот на синдикати на Македонија и бараат негово повлекување за да биде доработен без сите негативни ефекти кои ќе ги предизвика, во консултации со претставниците на работниците синдикатите и експерти од Меѓународната организација на труд и останати чинители преку инклузивен процес.
Од ССМ наведуваат дека во ниту еден момент не биле ниту вклучени ниту информирани за подготовката на Предлог-закон и велат дека „Владата преку МИОА во очи на Нова година на ЕНЕР го поставила Нацрт-законот за системот (кратење) на плати во јавниот сектор“.
Од Сојузот на синдикати велат дека според првичниот увид што го имале во текстот сметаат дека се намалуваат правата на работниците во делот за платите и се елиминира можноста за уредување на оваа материја со колективните договори со што значително ќе се влијае на укинување на колективните договори во јавен сектор во кои се уредени системот на плати и нивната исплата, а за што ССМ изминатиот период предупредуваше.
„Во нацрт- законот уредено е дека исплатата на дополнителната компонента на платата и надоместоците на плата зависи од тоа дали се предвидени средства во буџетот и на тој начин индиректно ќе се врши намалување на платите на вработените во дејностите каде што се исплаќа истата во овој момент“,
стои во соопштението.
Од ССМ наведуваат дека дополнително вредноста на бодот за ниво на работно место ја утврдува Собранието на предлог на Владата. Според нив, во процесот повторно се исклучени синдикатите и нивните претставници со што се елиминира нивната улога, односно Собранието на државата на предлог на Владата го утврдува коефициентот за максимален износ на плати во различни платни потсистеми.
„Она што загрижува е дека платите дополнително ќе се намалуваат доколку работникот користи годишен одмор, што е уставно загарантирано право и за време на користење на годишен одмор вработените имаат право на плата во висина на нивната основна плата, а за време на привремена неспособност за работа надомест на плата во висина од 80 отсто од основната плата. Се ова укажува дека во нацрт- законот е предвидена максимална надлежност на државните органи во регулирањето на оваа материја без социјален дијалог и активно учество на ЕСС и синдикатите како претставници на работниците со што се крши Конвенцијата за правата на работниците во јавниот сектор, како и другите меѓународни документи и принципи за активен социјален дијалог и право на колективно договарање на вработените во јавниот сектор“,
се вели во соопштението од ССМ.
Владата, како што се наведува, продолжува со веќе воспоставената пракса на озаконување на сите незаконитости, кои се случуваат на грбот на работниците што е преседан во поглед на уредување на работните односи и социјалниот дијалог.
Вчера и од Синдикатот за култура на Македонија објавија реакција по повод предлог-законот за платите во јавниот сектор, а во неа се вели дека новиот предлог-закон става крај на синдикатите, колективното договарање и социјалниот дијалог.
„Предложениот нацрт-закон е своевиден преседан својствен за диктатури, квазидемократии и хибридни држави, а не на држави од теркот на ЕУ. Неуставниот предлог-закон предлага убиство на синдикатите, колективното договарање и социјалниот дијалог, не само загарантирани со нашиот Устав, туку и темелните вредности на ЕУ, кон кои оваа држава постојано декларира дека се стреми“,
се наведува во вчерашната реакција на СКРМ.
Министерството за информатичко општество и администрација (МИОА) го презентира предлог-законот за системот на плати во јавниот сектор, кој може да се најде објавен во ЕНЕР заедно со нацрт-извештајот за оценка на влијанието на регулативата. Со овој предлог-закон, за првпат во Северна Македонија се прават обиди да се елиминираат разликите во платите во институциите од ист тип, како и да се воспостави ред во системот на плаќања.
Новиот предлог-закон за системот на плати донесува единствена Методологија и „еднаква плата за работа со еднаква вредност“.
Овој закон ќе ги опфати сите 1 346 јавни институции со околу 132 088 вработени кои се вклучени во Законот за вработени во јавниот сектор. Платите ќе бидат хиерархиски подредени од највисоко до најниско ниво, а на врвот е платата на претседателот на државата. За сите во јавната администрација ќе се утврди работно место со бодови чија вредност ја утврдува Собранието. Парламентот ќе носи и одлука за коефициентите за максималната плата, што ќе се добива како резултат од множење со минималната плата. Тоа значи дека порастот на минималната плата ќе донесе и корекција на платите кај работодавачите во јавниот сектор, што ќе се користи и при кризна состојба. Методологијата и Класификацијата на работните места ги утврдува Владата со уредба.