Овој закон ќе ги опфати сите 1 346 јавни институции со околу 132 088 вработени кои се вклучени во Законот за вработени во јавниот сектор. Платите ќе бидат хиерархиски подредени од највисоко до најниско ниво, а на врвот е платата на претседателот на државата
Министерството за информатичко општество и администрација (МИОА) го презентира Предлог-законот за системот на плати во јавниот сектор, кој може да се најде објавен во ЕНЕР заедно со Нацрт-извештајот за оценка на влијанието на регулативата. Со овој Предлог-закон, за првпат во Северна Македонија се прават обиди да се елиминираат разликите во платите во институциите од ист тип, како и да се воспостави ред во системот на плаќања.
Новиот Предлог-закон за системот на плати донесува единствена Методологија и „еднаква плата за работа со еднаква вредност“.
Овој закон ќе ги опфати сите 1 346 јавни институции со околу 132 088 вработени кои се вклучени во Законот за вработени во јавниот сектор. Платите ќе бидат хиерархиски подредени од највисоко до најниско ниво, а на врвот е платата на претседателот на државата. За сите во јавната администрација ќе се утврди работно место со бодови чија вредност ја утврдува Собранието. Парламентот ќе носи и одлука за коефициентите за максималната плата, што ќе се добива како резултат од множење со минималната плата. Тоа значи дека порастот на минималната плата ќе донесе и корекција на платите кај работодавачите во јавниот сектор, што ќе се користи и при кризна состојба. Методологијата и Класификацијата на работните места ги утврдува Владата со уредба.
До средината на февруари, ќе се организираат јавни дебати и расправи за понудените законски решенија. Сите досегашни посебни закони и колективни договори со кои се регулираат платните потсистеми треба да се усогласат во рок од две години.
Овој предлог закон, креиран со поддршка на СИГМА и во соработка со Министерството за финансии, Министерството за труд и социјална политика и Генералниот секретаријат на Владата на РСМ, како што посочуваат од МИОА, има за цел еднаквост и го носи основниот принцип на „еднаква плата за работа со еднаква вредност“ , односно обезбедува еднаквост и еднаква евалуација за секое работно место во јавниот сектор.
„Со оваа иницијатива ќе се воспостави правило каде систематски ќе се врши зголемување на платите и ќе има јасна поврзаност со економско-финансискиот систем. Вреди да се напомене дека Методологијата што ќе биде изготвена за платите, има должност консултативно да ги вклучи уставните права за колективните договори, каде посебен акцент ќе биде ставен на буџетската и финансиската стабилност“,
нагласуваат од МИОА.