Синдикатите велат дека настојуваат да се помогне на работниците со најниски примања и поради тоа барањето за зголемување на платите за 2 806 денари веднаш е солидарно решение
Сојузот на синдикати на Македонија (ССМ) бара итна средба со Владата бидејќи во ребалансот на Буџетот, како што велат, не гледаат дека има пари за покачување на платите во јавниот сектор.
„Потсетуваме дека во преговорите за нов Општ колективен договор за јавниот сектор беше прифатено дека линеарното зголемување на платите за најмалку 2 806 денари ќе се случи со ребалансот на буџетот, како што бевме убедувани од Владата, но за жал се покажува дека тоа било само купување на време и играње со судбината на 130 илјади работници во државата во време кога економската, енергетската криза и инфлацијата ги јадат работничките плати“,
велат од ССМ.
На средбата во Владата што ја бараат, велат, сакаат да биде потврдено тоа што начелно било договорено, како и истото да се реализира веднаш.
„Ако не биде постигнат договор за 2 806 денари сега, од септември истото ќе изнесува 18,4 проценти односно онолку за колку што се зголеми минималната плата согласно Закон, каде што рокот од 6 месеци мора да се испочитува за што и Владата јасно истакна дека во рок од 6 месеци ќе се усогласат останатите плати и од тоа назад нема“,
нагласуваат од ССМ.
Од Сојузот потсетуваат дека барале зголемување на платата уште од 1 мај и поради тоа на улица излегле над 7 500 работници, кои јасно упатиле пораката дека зголемени плати им се потребни веднаш.
„ССМ настојува да се помогне на работниците со најниски примања и поради тоа барањето за зголемување на платите за 2 806 денари веднаш е солидарно решение, а во спротивно и од сигналите кои со ребалансот се испраќаат, солидарноста ќе ја снема и работниците ќе го бараат тоа што им следува по закон“,
соопштија од ССМ.