Според Министерството, од безбедносна проценка е утврдено дека постои висок ризик да биде загрозена безбедноста на учесниците и на двете маршрути по најавените правци, но и безбедноста на другите граѓани
Српското Министерство за внатрешни работи ја забрани протестната прошетка на овогодинешниот „Европрајд 2022“, најавена за 17 септември, но истовремено нема да биде дозволена ниту прошетката организирана од десничарската неформална група „Антиглобалисти“ која е против одржување на меѓународниот настан, јави РСЕ.
Десничарската група во два наврати претходно организираше собири против „Европрајд“ во Белград, а истиот протестен собир беше најавен и за денот на Парадата на гордоста.
Според Министерството, од безбедносна проценка е утврдено дека постои висок ризик да биде загрозена безбедноста на учесниците и на двете маршрути по најавените правци, но и безбедноста на другите граѓани.
„Проценето е дека постои ризик од напади и конфликти, како и ризик од насилство, уништување имот и други облици на нарушување на јавниот ред во поголем обем“,
соопшти Министерството. во своето објаснување.
Информацијата за забраната на социјалните мрежи ја потврдија и организаторите на настанот.
NEWS: The #EuroPride2022 March on Saturday has been banned by police because of threats from counter-protests. This is a total failure of political leadership in Serbia. We are working with the @BelgradePride team on alternative solutions. https://t.co/a8eLwxZIX8
— EPOA • EuroPride (@EuroPride) September 13, 2022
„Маршот ‘Европрајд 2022’ кој требаше да се одржи во сабота е забранет од полицијата поради закани од контрапротести. Ова е тотален неуспех на политичкото раководство во Србија. Ние работиме со Белград прајн на алтернативни решенија“,
се вели во објавата од организааторот.
Како што соопштија од Белград Прајд на Инстаграм, министерството официјалното решение за забраната им го врачило на организаторите денеска.
„Белград Прајд ќе ги искористи сите расположливи правни механизми за да ја оспори оваа одлука“,
објави Белград Прајд на Инстаграм.
Кристине Гарина, претседателка на ЕПОА, рече дека полицијата чекала последен можен момент за формално да го забрани маршот на Европрајд.
„Секогаш кога ова се случуваше во Белград претходно, судовите ја прогласуваа таа одлука за неуставна. Не може да се дозволи да остане првата забрана за маршот на ‘Европрајд’ и не се сомневам дека судот овојпат ќе го заземе истиот став“,
изјави Гарина.
Таа рече дека ниту една земја која се почитува себеси нема да попушти пред насилниците.
„Забраната е залудна. Илјадници ЛГБТИ+ луѓе и нивните сојузници веќе се во Белград за да учествуваат во Европрајд“,
рече Гарина.
Таа најави дека ЛГБТ+ заедницата ќе се собере на 17 септември, дури и ако не може да ја одржи прошетката.
Министерот за внатрешни работи Александар Вулин денеска во писмена изјава истакна дека, покрај борбата против сите форми на криминал, главна задача на припадниците на министерството е да го зачуваат јавниот ред и мир и да го гарантираат безбедноста и имотната сигурност на секој граѓанин.
„Токму затоа Министерството за внатрешни работи не дозволува одржување на две прошетки – ‘Европрајд’ и ‘Антиглобалистичка’. Во актуелната геополитичка ситуација и тензиите во регионот, бесмислените конфликти на улиците на Белград би ја отежнале положбата на нашата земја, би ја загрозиле безбедноста на учесниците на прошетката, како и на другите граѓани“,
рече министерот Вулин писмена изјава.
Тој апелираше и до сите да го почитуваат законот и, како што наведе, да ги остават настрана своите лични и политички интереси и да не ја загрозуваат сопствената или туѓата безбедност.
„Европрајд“ е паневропски ЛГБТИ+ настан, кој се одржува секоја година во различен град во Европа. Според организаторите на настанот, белградскиот „Европрајд“ ќе биде историски затоа што е првпат да се одржува во некоја земја од Западен Балкан и воопшто во овој дел од Европа.
Досега овој настан привлече големо внимание во јавноста откако српскиот претседател Александар Вучиќ најави дека настанот ќе биде откажан од безбедносни причини.
Со кревање на знамињата на виножитото, пред Палатата на Србија вчера официјално започна манифестацијата „Европрајд 2022“.
Организаторите претходно посочија дека се подготвени за дијалог со институциите доколку треба да се смени трасата. Тие претходно најавија дека прошетката ќе ја одржат и во случај на забрана.
Партнерската организација Civil Rights Defenders на својот официјален Твитер профил објави дека организаторите се подготвуваат да поднесат жалба до судот.