Во однос на темите за кои разговарале со своите бугарски колеги, членовите од македонскиот тим посочуваат дека до израз дошле различните позиции на двете страни. Сепак, како што додаваат, средбата поминала во конструктивна и динамична атмосфера
Вчера и денеска во Скопје се одржала 34. средба на членовите на Заедничката мултидисциплинарна експертска комисија за историски и образовни прашања меѓу Северна Македонија и Бугарија.
На средбата, за која денеска информираат од македонскиот тим од комисијата, се разговарало за предлог-препораките за македонските учебници за седмо одделение, како и за евентуални заеднички чествувања. Во однос на темите за кои разговарале со своите бугарски колеги, членовите од македонскиот тим посочуваат:
„…При што до израз дојдоа различните позиции на двете страни.“
Сепак, како што додаваат оттаму, средбата поминала во конструктивна и динамична атмосфера.
„Во духот на градење доверба, македонскиот дел од Комисијата настојува да одржува проактивен пристап, согласно позитивните европски практики и искуства“,
се вели во соопштението на македонскиот тим.
Во рамките на дводневната средба во Скопје биле усогласени и усвоени заостанатите записници и стенограми од работата на Комисијата во 2023 година.
Претходната средба на заедничката историска комисија се одржа на почетокот на декември лани во Софија. И на претходната, како и на оваа средба, како што беше соопштено, станало збор за евентуални заеднички чествувања и за препораките за македонските учебници за седмо одделение.
Следната средба на мешовитата комисија предвидено е да се одржи во април во Софија.