На средбата со евроамбасадорот Гир, Џафери нагласил дека Владата ќе продолжи со истата динамика, посветеност и навременост да ги спроведува сите процеси и обврски кои произлегуваат од започнатите пристапни преговори со Европската Унија во насока на забрзана европска интеграција
Поддршка од ЕУ и Делегацијата во Скопје во продолжување на соработката и поддршка на институциите во реализирањето на европската агенда на државата добил премиерот на преодната влада Талат Џафери на денешната средба со амбасадорот на Европската Унија во Република Северна Македонија, Дејвид Гир.
На средбата, како што информираат од владината прес-служба, Џафери изразил задоволство што неговата прва средба со претставник на меѓународната заедница е токму со амбасадорот на ЕУ во Северна Македонија, што претставува јасен знак за насоката на движење на Владата во следниот период.
Заблагодарувајќи се на амбасадорот Гир за принципиелната поддршка на Северна Македонија од страна на ЕУ во процесот на остварување на стратегиска цел на државата – членството во ЕУ, Џафери истакнал дека Владата ќе продолжи со активностите за унапредување на демократијата и владеењето на правото, како и борбата против корупцијата и зацврстување на правната држава.
Премиерот Џафери, се додава во соопштението, истакнал дека претстојните избори се од исклучителна важност за иднината на земјата, бидејќи тие ќе го одредат текот на движење и напредокот во следниот период. Џафери нагласил и дека Владата ќе продолжи со истата динамика, посветеност и навременост, да ги спроведува сите процеси и обврски кои произлегуваат од започнатите пристапни преговори со Европската Унија во насока на забрзана европска интеграција.
„Посебен акцент на средбата беше ставен на заедничката посветеност на Брисел и Скопје кон натамошното успешно придвижување на активностите врзани за Планот за раст за Западен Балкан, и во таа насока, амбасадорот Гир го поздрави досегашниот конструктивен пристап на Владата“,
се додава во соопштението.
На средбата биле разменети и мислења за актуелни прашања од внатрешно-политичката состојба во земјата и претстојните избори. Во тој поглед, амбасадорот Гир нагласил дека ЕУ, како и досега, ќе ги поддржи активностите на ОДИХР во обезбедување набљудувачка мисија и спроведување фер и демократски претседателски и парламентарни избори.