Од вечерва од 20 часот до 5 часот наутро на територијата на целата држава е забрането движењето на улиците и на сите лица, освен органите на власта и оние што ќе имаат работна обврска во трета смена
Во Србија, покрај вонредната состојба, денеска во сите градови од 10 часот стапи во сила мерката за забрана на движење на сите лица постари од 65 години и 70 години во руралните области, согласно синоќешните нови мерка на Владата во справувањето со пандемијата со коронавирус, јави МИА од Белград.
Со неа вечерва од 20 до 5 часот наутро на територијата на целата држава е забрането движењето на улиците во Србија и на сите лица, освен органите на власт и оние што ќе имаат работна обврска во трета смена.
Министерот за внатрешни работи Небојша Стефановиќ денеска изјави на ТВ Пинк дека полицискиот час и други мерки се воведени поради недисциплина на дел од граѓаните. Тој порача дека полицијата постојано ќе ги проверува лица на кои им е одредена изолација.
„Кого полицијата ќе го затекне на улица по 20 часот и нема писмена дозвола, ќе добие кривична пријава, ќе се спроведе на домашна адреса, а потоа ќе се води кривична постапка против него“,
изјави Стефановиќ.
Според него, речиси 50 000 луѓе се вратиле од странство во Србија од почетокот на кризата, повеќето се од Италија, а голем број не успеале да ја исполнат обврската за изолација, што довело до ширење на заразата.
Во Србија утринава евидентирани се вкупно 83 лица заразени со коронавирусот, што е за 11 лица повеќе од вчера, соопштија од Министерството за здравство.
Веќе два дена во сила е вонредна состојба, затворени се границите за влез на странски државјани, поголемиот дел на вработените работат од дома, војската е распоредена на граничните премини, болниците, мигрантските центри, на улиците е зголемено присуството на полицијата.