Премиерката Ана Брнабиќ денеска оцени дека зголемениот број на заразени е резултат на протестите
Владата на Србија денеска донесе нови мерки, на предлог на Кризниот штаб за заштита од ковид, со кои се предвидува забрана за собирање на повеќе од десет лица на јавни места, и на отворено и во затворено.
Владата препорача да се користат маски на сите јавни места надвор, додека употребата на маски е задолжителна на места каде што не е можно да се обезбеди растојание од најмалку 1,5 метри, како што се редици пред продавниците, аптеките, автобуските и железничките постојки.
„Носењето заштитна маска е задолжително на сите јавни места во затворено, што значи дека родителите на малолетни деца, како и на деца со посебни потреби и нивните старатели, се должни да обезбедат нивните деца да носат заштитна маска“,
се вели во владиното соопштение.
Во Србија, во изминатите 24 часа починаа 13 лица од ковид-19, со што вкупниот број на смртни случаи за време на епидемијата се зголеми на 442. Денеска се регистрирани нови 383 заразени, од 9 183 тестирања. На респиратори се 177 лица.
Најавата за карантин на почетокот на овој месец предизвика протести кои потоа прераснаа во масовни демонстрации против власта, кои од 9 јули кога започнаа, и ескалираа со нереди и упад во Собранието, апсења и повредени, од ден во ден се со помала масовност.
Премиерката Ана Брнабиќ денеска оцени дека зголемениот број на заразени е резултат на протестите.