На прес-конференција српската премиерка Ана Брнабиќ кажа дека не верува дека блокадите на северот од Косово ќе бидат насилно отстранети бидејќи тоа би значело директен напад на луѓето кои се таму, а меѓу нив има жени, постари лица но и деца.
Брнабиќ вели дека се уште не знае како да разговара за француско-германскиот предлог кога Бриселскиот договор од 2013 г. не е спроведен во целост, односно се уште не е формирана Заедницата на српските општини. Таа вели дека на Косово има разумни лица, но премиерот Албин Курти не е еден од нив, бидејќи член од неговата партија објави листа на лица кои би требало да бидат уапсени, на кои се наоѓаат и членови на потесното семејство на претседателот на Србија, Александар Вучиќ.
“Има смисла за разговор со меѓународните актери, пред сѐ КФОР”,
кажа Брнабиќ.
Брнабиќ вели дека Србија има добра соработка со КФОР и ги нарече коректни бидејќи се уште се разгледува српското барање за враќање на дел од војската на Косово, согласно резолуцијата 1244 на ООН. Вели дека КФОР се сериозни бидејќи не го одбиле предлогот и се уште се чека на нивен одговор.
Во однос на новиот предлог за решавање на проблемот предложен од ЕУ, во јавноста познат како француско-германски предлог, таа вели дека Србија чека да се испочитува првиот договор од Брисел, за кој гарант била Европската унија.
„Сè уште чекаме да се спроведе првиот договор од Брисел. Не знам како да разговараме за новиот француско-германски предлог кога првиот договор не е спроведен“,
вели премиерката.
Таа вели дека Србија е отворена за дискусија, но главното прашање за ЕУ и САД е кој би го гарантирал спроведувањето на новиот договор со Косово.