Власта нема ниту волја, ниту капацитет да ги реши проблемите кои го туркаат Охрид кон листата на загрозени УНЕСКО подрачја.
Ова е ставот на опозициската ВМРО-ДПМНЕ, кој доаѓа само еден ден откако пратениците на оваа партија пред собраниската комисија за култура известија дека нема да го поддржат предлог-законот за управување со природното и културното наследство во Охридскиот регион.
„Очигледно власта на чело со СДСМ ниту сака, ниту има капацитет да го реши проблемот со Охрид. Додека одговорноста си ја префрлаат од еден на друг, Охрид би можел за прв пат да се најде на листата на светско културно наследство во опасност, во друштво на држави како што се Авганистан, Конго, Ирак, Палестина, Сирија и Узбехистан. Надлежните институции наместо веднаш да започнат со решавање на проблемот со дивоградбите, владата предлага нов предлог закон со кој купува време и бега од одговрност. Владата, општините и сите надлежни институции можеа и требаа досега да донесат одлука за рушење на дивоградбите и без овој нов закон, односно со веќе постоечкиот закон“,
изјави пратеничката Ане Лашкоска.
Пратениците на ВМРО-ДПМНЕ кои членуваат во комисијата за култура, вчера предлог-законот го етикетираа како скандалозен – поради нееднаквите критериуми кои важат при именувањето на идните членови на Советот за Охридскиот регион, но и поради одлучувањето кое Советот би требало да го прави преку Бадентер, а за кое велат дека е неуставно. Според опозицијата постои опасност решавањето да биде пристрасно и само во корист на градоначалниците на Охрид и Струга за своите обврски да ги префрлаат на ова тело.