Од невладината организација, пак, велат дека во доверба дале клуч од просторот на Општината бидејќи била организирана изложба. Таа траела од понеделник (21 ноември) до денеска (25 ноември), но наместо да го добијат клучот назад, во текот на минатата ноќ бравата била променета
Невладината Социјален културен простор Тетово, позната како „Спејс Тетово“, има меморандум да го користи поранешниот простор на Радио Тетово за конкретни активности како и сите други здруженија, па треба да си поднесе барање до Општината ако сака да го користи за некој настан.
Со ваков став за ТВ Алсат излегле од Општина Тетово откако од невладината организација објавија дека не може да влезат просторот што тие го ревитализираа во 2018 година и имаат меморандум за користење до април 2024, бидејќи им ја замениле бравата.
„Меморандумот за соработка меѓу здружението и општината е конкретно само за активности и проекти. И секое здружение, како раководител на секторот за јавни дејности, повикувам секое културно или образовно здружение на млади да се обрати до општината со барање, а општината ќе ги разгледа сите здруженија кои имаат активности, од општина Тетово ќе им се овозможи да ги извршуваат истите активности“,
изјави за ТВ Алсат Назми Даути од Секторот за јавна дејност на Општина Тетово.
Просторот досега непречено го користеше „Спејс Тетово“. Откако нејзините активисти го ревитализираа во 2018 година и го претворија со социјален-културен центар, попишаа неколку меморандуми за користење од кои последниот е со важност од април 2021 до април 2024. Меѓутоа, денеска објавија дека во доверба дале клуч од просторот на Општината бидејќи била организирана изложба. Таа траела од понеделник (21 ноември) до денеска (25 ноември), о наместо да го добијат клучот назад, во текот на минатата ноќ бравата била променета.
Тие објавија и видео и за ова ја обвинуваат Општината која уште претходниот месец сакаше да им го одзеде просторот.
„Ги споделуваме снимките од безбедносните камери на кои јасно може да се види како синоќа (24.11.2022 г.) од 23:33 часот овие лица (за кои немаме информации какви функции извршуваат во Општината или дали воопшто имаат некакви функции) ја отвораат вратата со клучот земен во доверба од заедницата (а потпишан од една од организаторите на претходната изложба, Елма Шерифи), по повод организацијата на колективната изложбата, за потоа да ја променат бравата на влезната врата, инвестиција на волонтерите на ДКЦ-Тетово и си честитаат за овој вандалски чин. После тоа, рано наутро, ги запираат и камерите за да не снимаат други настани. Ова треба да биде културниот сектор на општинската администрација, култивиран за интриги и вандализам“,
пишува во објавата на Фејсбук од „Спејс Тетово“.
Општината минатиот месец сакаше да им го одземе просторот и го определи општинското Одделение за култура и спорт како надлежен сектор да ги координира сите културни активности на невладините организации. Тие побараа од „Спејст Тетово“ да го ослободи објектот и, како и други невладини, да аплицира со поединечни настани за да може да го користат.
По јавното спротивставување на активистите, ситуацијата околу тоа кој го користи просторот остана „статус кво“. Од една страна, Општината остана на барањето за ослободување, од друга страна, „Спејс Тетово“ на тврдењето дека тие имаат право да располагаат со просторот што сами го ревитализираа.