Земјотрес со јачина од 5,6 степени според Рихтеровата скала го погоди градот Сианџур во Западна Јава на длабочина од 10 километри
Спасувачите во Индонезија трагаат по луѓето кои се уште се заробени во урнатините еден ден по силниот земјотрес што го погоди островот Јава, при што загинаа најмалку 162 лица, повеќето деца, а стотици други беа повредени.
Земјотрес со јачина од 5,6 степени според Рихтеровата скала го погоди градот Сианџур во Западна Јава на длабочина од 10 километри.
Стотици луѓе се префрлени во болниците, додека многумина се лекувале пред нив.
Спасувачите работеа во текот на ноќта за да се обидат да спасат други, кои сè уште беа заробени во урнатините на зградите.
Областа каде што го погоди земјотресот е густо населена и подложна на лизгање на земјиштето, а лошо изградените куќи се претворени во урнатини во многу области.
Ридван Камил, гувернер на Западна Јава, изјави дека загинале најмалку 162 лица.
„Повеќето од загинатите се деца, многумина од нив се ученици кои биле на дополнителни часови. Толку многу инциденти се случија во неколку исламски училишта“,
додаде тој.
Властите работеа „под претпоставка дека бројот на повредени и загинати ќе се зголемува со текот на времето“, рече тој.
Зборувајќи за локалните медиуми, Камил рече дека околу 326 лица се повредени во земјотресот, истакнувајќи дека повеќето од нив се здобиле со скршеници од згмечување во урнатините.
Гувернерот на Западна Јава додаде дека повеќе од 13 000 луѓе се раселени поради катастрофата, а повеќе од 2 200 домови биле оштетени од земјотресот.
Привремените податоци објавени од властите, цитирани од „Спасете ги децата“ (Save the Children), покажуваат дека се погодени околу 51 образовна институција, вклучувајќи 30 основни училишта, 12 средни училишта, една гимназија, пет стручни училишта и едно специјално училиште.
Во локалната болница, преплавени од бројот на пациенти, повредените лежеа на подот, на душеци и ќебиња или под импровизирани шатори. Во понеделникот вечерта на жртвите им беше укажана помош во темница, со факел, поради прекин на струја.
Камил твитна во понеделникот вечерта дека може да поминат три дена пред целосно да се врати струјата во областа. Тој додаде дека приемот на мобилните телефони е сè уште слаб и предизвикува „многу проблеми“ за службениците.
Во вторникот наутро, стотици полицајци беа распоредени за да помогнат во спасувачките напори, изјави портпаролот на националната полиција Деди Прасетјо за државната новинска агенција Антара.
„Главната задача на персоналот денес е да се фокусира на евакуација на жртвите“,
рече тој.
Фото: EPA-EFE/ADI WEDA