Потрагата по преживеани продолжува, а локалните власти наведуваат дека се урнале голем број згради, поради што се стравува дека бројот на жртвите е поголем
Расте бројот на загинати во земјотресот со јачина од 5,6 степени според Рихтеровата скала што денеска ја погоди Индонезија. Според последните информации од локалните власти, во земјотресот загинале најмалку 162 лица, а 326 се повредени.
Потрагата по преживеани продолжува, а локалните власти наведуваат дека се урнале голем број згради, поради што се стравува дека бројот на жртвите е поголем.
Бирото за метеорологија и геофизика (БМКГ) претходно соопшти дека земјотрес со интензитет од 5,6 степени според Рихтеровата скала го погодил главниот град на Индонезија, Џакарта, а епицентарот на земјотресот бил во градот Цианџур, Западна Јава, на длабочина од 10 километри.
Два часа по земјотресот биле регистрирани 25 последователни потреси.
Во областа погодена од земјотресот во прекин е снабдувањето со електрична енергија.
Повеќе од 2 200 куќи се оштетени, а локалните власти соопштија дека повеќе од 13 илјади луѓе кои не можат да се вратат во своите домови, се преместени во центрите за евакуација.
Индонезија се протега низ таканаречениот „Пацифички огнен прстен“, високо сеизмички активна зона каде што се спојуваат различни плочи на земјината кора и создаваат голем број земјотреси и вулкани.