Ќе имаме околу илјада учесници на Самитот. Тоа е една опсежна акција која треба да ја спроведеме од безбедносен аспект и целосно сме подготвени сите служби, рече министерот за внатрешни работи
Министерството за внатрешни работи е клучно за безбедноста на Министерскиот самит на ОБСЕ. Заедно со група на многу владини институции се подготвуваме цела година за овој Самит да помине во најдобар можен ред, изјави денеска во Битола министерот за внатрешни работи Оливер Спасовски.
Тој информира дека е најавено присуство на повеќе од 70 делегации коишто се предводени од нивните шефови, пред се министри за надворешни работи.
„Ќе имаме околу илјада учесници на Самитот. Тоа е една опсежна акција која треба да ја спроведеме од безбедносен аспект и целосно сме подготвени сите служби и СВР Скопје, Одделот за заштита на определени личности, објекти, Единицата за службени кучиња, воздухопловната единица. Значи сите учествуваме во рамки на својот дел, секако и другите институции. Јас очекувам дека се ќе помине во најдобар можен ред“,
истакна Спасовски.
Ова, како што посочи министерот, е исклучително важен Самит за Република Северна Македонија, бидејќи ние имаме шанса да покажеме капацитетност и демократски вредности.
„И од тој аспект сметам дека на сите нас треба да ни биде чест да учествуваме во организација на овој самит. Затоа апелирам до граѓаните, да имаат трпение за овие денови на одржување на Самитот и да ги почитуваат наредбите на полициските службеници, затоа што нема да имаме целосна блокада на градот на движењето итн. Меѓутоа ќе имаме блокада на одредени улици, делници по кои што ќе се движат делегациите се со цел да имаме мир и безбедност, и граѓаните и Самитот да протече во најдобар можен ред“,
нагласи Спасовски.
Триесеттиот Министерски совет на Организацијата за безбедност и соработка во Европа (ОБСЕ) ќе се одржи на 30 ноември и 1 декември, во салата „Борис Трајковски“ во Скопје. Настанот, на кој се очекува присуство на делегации од 57 земји учеснички и партнери на ОБСЕ, се одржува во рамки на македонското претседавање со оваа меѓународна организација.